Mesiq aludon në Vuciqin: Fatkeqësisht, ka ende nga ata, si Millosheviqi, që synojnë ta bëjnë Serbinë të madhe

Lajme

Gazeta Express

29/04/2024 7:31

Gjatë qëndrimit në Prishtinë, në takimin Panshqiptar-Ndërballkanik-Euroatlantik, Stjepan Mesiq deklaroi se Serbia e Madhe nuk mund të krijohet dhe se ka ende njerëz, si Sllobodan Millosheviqi, që synojnë zgjerimin serb.

Takimi është mbajtur në kuadër të shënimit të 25 vjetorit të luftës për pavarësinë e Kosovës.

Me këtë deklaratë ish-presidenti kroat ka aluduar për presidentin serb Aleksandar Vuçiq.

Mesiq ka thënë se Millosheviqi është përgjegjës për viktimat në Kroaci, BeH dhe Kosovë.

“Kur shkova në Beograd atëherë isha kryetar i Presidencës së Jugosllavisë. Guxoj të them se do të jem presidenti i fundit i Jugosllavisë. Millosheviqi mund të nuk pajtohem me atë që propozuam – që të bëhet një konfederatë. Ai nuk e pranoi këshillën tonë dhe shkoi në një drejtim tjetër. Nisma ime ishte që secili vend të ecë rrugën e vet. Millosheviqi dhe njerëzit e tij nuk mund ta pranonin këtë model, i cili do të ishte pa luftë, pa viktima dhe do të ishte në interes të mbarë kombit. Të gjithë e pamë se si përfundoi dhe me sa viktima. Fatkeqësisht, ka ende nga ata, si Millosheviqi, që synojnë ta bëjnë Serbinë të madhe, por unë ju them se nuk mund të bëhet. Për të gjithë ata që mendojnë se Serbia mund të bëhet shtet i madh, them se Serbia është një vend i vogël në Ballkan”, ka thënë Mesiq, shkruan Koha Ditore.