Joshua vs. Fury, nënshkruhet marrëveshja për meçin e ri

Boks

Gazeta Express

27/04/2026 18:50

Anthony Joshua ka nënshkruar një marrëveshje për të luftuar kundër bashkëkombasit dhe ish-kampionit të peshave të rënda Tyson Fury, ka njoftuar promotori Eddie Hearn.

Joshua, i cili nuk ka luftuar që nga një aksident tragjik me makinë në dhjetor, do të zhvillojë fillimisht një meç rikthimi kundër boksierit shqiptar, Kristian Prengës më 25 korrik në Riad, në Arabinë Saudite.

Fury dhe Joshua, të dy dy herë kampionë bote, kanë dominuar boksin britanik dhe atë botëror për më shumë se një dekadë, por megjithëse janë zhvilluar negociata për vite, përballja e tyre ende nuk ishte realizuar deri tani.

Hearn ka deklaruar në rrjetet sociale se meçi i shumëpritur “është nënshkruar dhe finalizuar”, edhe pse data dhe vendi nuk janë konfirmuar ende.

Sipas raportimeve, ai mund të zhvillohet në nëntor, madje ekziston mundësia të transmetohet nga platforma “Netflix”.

Joshua, 36 vjeç, ka theksuar se po rikthehet gradualisht pas një periudhe të vështirë, duke përfshirë edhe aksidentin tragjik në Nigeri ku humbën jetën dy persona të ekipit të tij.

“Kam marrë kohë për t’u rikuperuar dhe për t’u përgatitur për rikthimin në ring,” tha ai.

Në anën tjetër, Fury, 37 vjeç, është gjithashtu në një fazë rikthimi dhe ka vazhduar ta sfidojë publikisht Joshua-n për këtë përballje historike.

Joshua duhet fillimisht të kalojë me sukses meçin ndaj Prengës, i cili ka 20 fitore me nokaut në 21 ndeshje, përpara se të mendohet për sfidën e madhe britanike.

Nëse gjithçka shkon sipas planeve, kjo përballje pritet të jetë një nga më të mëdhatë në historinë e boksit modern./GazetaExpress/