Japonia lëshon raketë në stërvitje të përbashkët me SHBA-në dhe aleatët në veri të Filipineve, me pamje kah Deti i Kinës Jugore

Lajme

Gazeta Express

06/05/2026 15:34

Japonia ka qëlluar me raketë në një stërvitje të përbashkët me SHBA-në dhe aleatët në veri të Filipineve, përballë Detit të Kinës Jugore.

Forcat Vetëmbrojtëse të Japonisë (JSDF) kanë lëshuar një raketë kundër anijeve të tipit Type 88 gjatë një ushtrimi të përbashkët detar me forcat amerikane, australiane dhe filipinase të mërkurën, duke goditur një anije të çmontuar të Marinës së Filipineve në ujërat përballë Detit të Kinës Jugore, shkruan Reuters.

Stërvitja u zhvillua në një kohë kur Manila dhe Tokio po zhvillojnë bisedime për një transferim të mundshëm të pajisjeve mbrojtëse, i mundësuar nga vendimi i Japonisë për të hequr kufizimet mbi eksportet ushtarake.

Diskutimet përfshijnë mundësinë e transferimit të hershëm të shkatërruesve të klasës Abukuma dhe avionëve TC-90 te Forcat e Armatosura të Filipineve, tha ministri japonez i Mbrojtjes Shinjiro Koizumi.

Ministri filipinas i Mbrojtjes Gilberto Teodoro dhe Koizumi e ndoqën lëshimin e raketës në terren, ndërsa presidenti i Filipineve Ferdinand Marcos Jr. e pa ushtrimin nga selia ushtarake në Manila përmes transmetimit të drejtpërdrejtë, tha zyra e presidentit.

“Aktiviteti demonstroi operacione të koordinuara të sulmit detar mes forcave aleate dhe theksoi aftësinë në rritje të AFP-së për të vepruar së bashku me partnerët ndërkombëtarë në promovimin e sigurisë rajonale dhe lirisë së lundrimit,” thuhet në deklaratë.

Ushtria filipinase tha se janë lëshuar dy breshëri raketash Type 88, të cilat goditën anijen BRP Quezon brenda gjashtë minutave nga lëshimi. Goditja ndodhi rreth 75 km nga bregu i Paoay në veri të Filipineve, zonë që përballet me Detin e Kinës Jugore.