Incident gjatë Vettingut, prokurori i shkarkuar ndjek anëtarët e KPK

Shqiperi

Gazeta Express

15/04/2021 13:24

Shkarkimi nga detyra nga KPK e prokurorit të Beratit, Tasim Puci nuk është pritur mirë nga ky i fundit, i cili ka reaguar. Pas dhënies së vendimit, prokurori Puci ka ndjekur nga pas anëtarët e trupës gjykuese teksa dilnin nga salla, duke i pyetur dy herë radhazi “Ku do më çoni tani, jam pa shtëpi e katandi”?

Ndjekja e tij ka bërë që të ndërhyjnë forcat e sigurisë duke sjellë qetësimin e situatës.

Gjatë seancës dëgjimore, prokurori Puci u pyet në lidhje me një kontratë noteriale në të cilën ai rezultonte pronar i një apartamenti, të cilin ia kalonte vjehrrit dhe disa shkëmbime financiare me këtë të fundit. Puci pretendoi se nuk kishte asnjë pasuri dhe kërkoi konfirmimin në detyrë.

Por kjo nuk ndodhi, pasi trupa e vettingut e kryesuar nga Olsi Komici, me relatore Suela Zhegu dhe anëtare Genta Tafa Bungo vendosi shkarkimin për prokurorin e Prokurorisë së Beratit, Tasim Puci. Sipas relatimit, ai u gjet me probleme në të tre kriteret e rivlerësimit, atë të pasurisë, pastërtisë së figurës dhe aftësive profesionale.