Grenell drejtor i përkohshëm zbulimi, Trump do të emërojë në këtë post dikë tjetër

Gazeta Express

20/02/2020 16:55

Ambasadori amerikan në Berlin dhe emisari për dialogun Kosovë-Serbi, Richard Grenell, sot në mëngjes sipas kohës evropiane, është caktuar nga Presidenti Trump si ushtrues detyre i Drejtorit të Inteligjencës Kombëtare. Vetë Grenell dhe Ambasada në Berlin bëjnë me dije se ai do të jetë në krye të zbulimit amerikan përkohësisht, derisa Trump ta nominojë dikë tjetër. Zëdhënësi i Grenell i ka thënë Gazetës Express se ambasadori mbetet i përkushtuar 100 për qind në negociatat Kosovë – Serbi

Besnik VELIU

Siç ka thënë ekskluzivisht për Gazetën Express, Dick Custin, Grenell në këtë pozitë do të jetë për një kohë të limituar, derisa Shtëpia e Bardhë të publikojë emrin të cilin do ta nominojë për ta emëruar Drejtor të Inteligjencës Kombëtare.

Custin ka potencuar se Grenell do të mbetet i përkushtuar me kapacitet të plotë në rolin e tij si ambasador në Gjermani dhe në pozitën e emisarit për dialogun Kosovë-Serbi.

“Dua të theksoj se Ambasadori Grenell është pajtuar me kërkesën e Presidnetit Trump për të marrë pozitën e Ushtruesit të Detyrës së Drejtorit për Inteligjencë Kombëtare për një periudhë të limituar kohore, dhe se Shtëpia e Bardhë do të publikojë të nominuarin e saj së shpejti. Bazuar në këtë, Ambasadori Grenell do të vazhdojë të mbetet Ambasador i SHBA’së në Gjermani dhe atë të Përfaqësuesit Special Presidencial për dialogun Kosovë-Serbi për negociatat e paqes, për të cilat ai mbetet 100 % i përkushtuar”, ka thënë Custin për Gazetën Express.

Lidhur me këtë ka shkruar edhe vetë Grenell në twitter duke thënë se Donald Trump do ta publikojë së shpejti emrin e të nomonuarit, por që do të jetë dikush tjetër e jo ai (Grenell).

Correct. Acting. The President will announce the Nominee (not me) sometime soon. https://t.co/9ShqB2eXea

— Richard Grenell (@RichardGrenell) February 20, 2020

Custin përveç tjerash ka konfirmuar për Gazetën Express se Richard Grenell do të vazhdojë të mbajë tri pozitat e tij njëkohësisht

“Mund të konfirmojmë që Ambasadori Grenell do të shërbejë si Ambasador në Gjermani, i dërguar Special Presidencial për negociatat e paqes në Serbi dhe në Kosovë dhe tani në rolin e Ushtruesit të Detyrës së Drejtorit Për Inteligjencë Kombëtare, njëkohësisht”, ka thënë Custin për Gazetën Express.

Gazeta Express sot gjatë ditës e thirrur në burimet e saj ka raportuar se Richard Grenell do të vazhdojë të jetë në të njejtën kohë ambasador në Gjermani, emisar për dialogun Kosovë-Serbi dhe ushtrues detyre i Drejtorit për Inteligjencë Kombëtare./GazetaExpress/