Fenerbahce nis negociatat me Milanin për Nkunku

Futboll

Gazeta Express

30/12/2025 13:22

Negociatat mes Milanit dhe Fenerbahçes për Christopher Nkunku kanë nisur, por ndërsa Rossonerët janë të hapur vetëm për të diskutuar një transferim të përhershëm, sulmuesi francez duket se nuk është i gatshëm të largohet nga San Siro në janar.

Sipas disa burimeve, përfshirë Gazzetta dello Sport dhe ekspertin turk të merkatos Yağız Sabuncuoğlu, Fenerbahçe ka hapur bisedime zyrtare për të afruar sulmuesin e Milanit gjatë afatit kalimtar të janarit.

Calciomercato.com raporton se klubi turk është i gatshëm të përmbushë kërkesën e Milanit prej 35 milionë eurosh, por nuk dëshiron të përfshijë Milan Skriniar në marrëveshje.

Rossonerët kanë shfaqur interes për ish-mbrojtësin e Interit, por Fenerbahçe nuk është i gatshëm të heqë dorë nga lideri i repartit mbrojtës. Nga ana tjetër, Milani pranon të diskutojë vetëm një transferim të përhershëm për Nkunku-n.

Gjithsesi, Fenerbahçe do të duhet të bindë edhe vetë lojtarin, pasi disa burime, përfshirë Ben Jacobs dhe Gianluca Di Marzio, raportojnë se ish-sulmuesi i Chelseat dëshiron të qëndrojë te Milani edhe muajin e ardhshëm, duke qenë se i është bashkuar gjigantëve të Serie A vetëm pak muaj më parë.