Efekti Vozinha: Colo Colo i fiton 20 milionë ndjekës, shpërthen entuziazmi në rrjetet sociale

Sport

Gazeta Express

04/08/2026 9:31

Transferimi i portierit të Kombëtares së Kepit të Gjelbër, Vozinha te Colo Colo e ka sjellë një efekt të jashtëzakonshëm edhe jashtë fushës së lojës.

Klubi kilian po e përjeton një bum të vërtetë në rrjetet sociale falë ardhjes së 40-vjeçarit, i cili u bë një fenomen global gjatë Kupës së Botës 2026.

Profili zyrtar i Colo Colo në Instagram e ka regjistruar një rritje të jashtëzakonshme të ndjekësve pas zyrtarizimit të Vozinhas, shkruan “Gazeta Express”.

Klubi i ka fituar rreth 20 milionë ndjekës të rinj, një shifër që e dëshmon ndikimin e madh mediatik të portierit afrikan, i cili gjatë Botërorit u shndërrua në një nga futbollistët më të ndjekur në botë.

Paraqitjet e shkëlqyera të Vozinhas me fanellën e Kepit të Gjelbër, veçanërisht ndaj Spanjës dhe Argjentinës, e kthyen atë në një sensacion në rrjetet sociale, duke i rritur ndjekësit personalë nga rreth 50 mijë në dhjetëra miliona brenda pak javësh.

Popullariteti i tij tashmë po reflektohet edhe te klubi i ri, i cili po përfiton ndjeshëm në aspektin e marketingut dhe të imazhit ndërkombëtar.

Në Kili, ardhja e Vozinhas ka shkaktuar një entuziazëm të madh te tifozët e Colo Colo, të cilët e konsiderojnë atë jo vetëm një përforcim të rëndësishëm në portë, por edhe një figurë që ia ka dhënë klubit një ekspozim të jashtëzakonshëm në arenën globale. /Gazeta Express