Donald Trump thyen heshtjen për planin e Gianni Infantinos, por shmang çdo koment

Futboll

Gazeta Express

01/08/2026 0:00

Presidenti i Shteteve të Bashkuara, Donald Trump, ka reaguar për herë të parë ndaj planit kontrovers të presidentit të FIFA-s, Gianni Infantino, për shitjen e aksioneve të një kompanie që do të menaxhonte Kupën e Botës, por ka refuzuar të japë një qëndrim të qartë.

Infantino është vënë nën presion të madh pasi propozoi krijimin e kompanisë FIFA Forward Enterprise (FFE), e cila do të administronte kompeticionet e FIFA-s.

Pjesa më e debatueshme e projektit është plani për të shitur 20 për qind të aksioneve të kësaj kompanie tek investitorë privatë.

Kompania amerikane Thrive Capital, e themeluar nga Joshua Kushner, vëllai i dhëndrit të Donald Trump, është përmendur si investitori kryesor i mundshëm.

Për të siguruar mbështetjen e 211 federatave anëtare të FIFA-s, Infantino premtoi një pagesë prej 30 milionë funtesh për çdo federatë që do ta mbështeste planin deri më 19 shtator.

Megjithatë, propozimi hasi në kundërshtime të mëdha.

UEFA reagoi ashpër dhe 55 federatat e saj paralajmëruan bojkotimin e Kupës së Botës gjatë një mbledhjeje urgjente.

Më pas, edhe konfederata të tjera si CONCACAF dhe AFC dolën kundër projektit, duke bërë që mbi 100 federata anëtare të FIFA-s të mos e mbështesin këtë nismë.

Kritikat nuk kanë ardhur vetëm nga jashtë FIFA-s.

Këshilltari kryesor i Infantinos, Carlos Cordeiro, dha dorëheqjen pas një deklarate të fortë kundër projektit, ndërsa drejtori operativ i FIFA-s, Kevin Lamour, gjithashtu e kritikoi publikisht presidentin e organizatës.

Lamour deklaroi se punonjësit e FIFA-s janë ndier “të mashtruar” nga ky propozim dhe madje vendosi në rrezik edhe postin e tij.

“Nëse kjo do të thotë se do ta humbas vendin e punës, atëherë le të jetë kështu. Do ta kuptoj dhe do ta respektoj atë vendim. Të paktën sonte do të fle i qetë”, u shpreh Lamour.

Ndërkohë, kur u pyet nga gazetarët gjatë një mbledhjeje të kabinetit presidencial në Camp David për planin e Infantinos, Trump shmangu çdo koment.

“Jo, nuk kam folur kurrë me të për këtë”, u përgjigj shkurt ai.

Trump dhe Infantino kanë krijuar një marrëdhënie të afërt gjatë përgatitjeve për Kupën e Botës 2026.

Në shortin e Botërorit, në dhjetor, Infantino i dorëzoi Trumpit çmimin e parë FIFA Peace Prize, një çmim i krijuar për të nderuar individët që, sipas FIFA-s, kanë ndërmarrë veprime të jashtëzakonshme për paqen dhe bashkimin e njerëzve në mbarë botën.

Ky vendim u kritikua ashpër pasi vetëm tre muaj më vonë Shtetet e Bashkuara ndërmorën sulme ushtarake ndaj Iranit.

Marrëdhënia mes tyre ishte vënë në qendër të vëmendjes edhe më herët, kur kartoni i kuq i Florian Balogun u pezullua për një vit, duke i mundësuar sulmuesit të luante në ndeshjen e fazës së 1/16-ës ndaj Belgjikës.

Trump kishte pranuar publikisht se kishte telefonuar Infantinon për ta pyetur nëse ishte e mundur apelimi i kartonit të kuq.

Së fundmi, polemikat u shtuan edhe më shumë pasi u raportua se Trump dëshironte ta propozonte Infantinon si sekretarin e ardhshëm të përgjithshëm të Kombeve të Bashkuara.

Për këtë arsye, nuk ishte surprizë që presidenti amerikan zgjodhi të mos shprehej lidhur me planin e diskutueshëm të kreut të FIFA-s./GazetaExpress/