Pacientja e shtrirë në QKUK nuk është e prekur nga koronavirusi

Gentiana Hasani

24/02/2020 14:13

Ka rezultuar negativ testi i analizave laboratorike rreth dyshimeve se një grua u prek nga virusi kinez koronavirusi, raporton Express nga burimet e saja.

U dyshua se një grua rreth të 30-ve, u kthye në Kosovë pas disa ditësh pushime në Itali. Ajo u paraqit mbrëmë në Klinikën Infektive.

Por në bazë të analizave të bëra nga Instituti Kombëtar i Shëndetit Publik rezultatet për këtë rast kanë dalë negative.

Sipas IKSHP-së, pacientja ka pasur ethe, djegie të syve, rrjedhje hunde dhe fytin e ndjeshëm. Ekipi i Laboratorit të Mikrobiologjisë Molekulare në IKSHPK ka bërë testimin në virusin.

“SARS-CoV-2 me metodën rRT-PCR. Testi ka rezultuar negativ, domethënë pacientja nuk është infektuar me virusin SARS-CoV-2. Laboratori mikrobiologjik/IKSHPK është pajisur me kite dhe reagensa për detektimin e 2019-nCoV”, deklaron IKSHP-ja.

Sipas tyre, ekipet po përcjellin me vëmendje situatën epidemiologjike me Koronavirus në botë.

Ndërkohë, komiteti për monitorimin e sëmundjeve ngjitëse ka konstatuar se janë përforcuar masat për monitorimin, parandalimin e rrezikut të përhapjes së koronavirusit të ri.