Vret gruan në mes të qytetit, policia prangos 63 vjeçarin

Gazeta Express

26/02/2020 11:59

Policia ka ndaluar autorin e vrasjes në Durrës. Në pranga ka rënë Ruzhdi Tosuni, burri i cili pas konfliktit verbal me të shoqen, e goditi me levë duke e lënë të vdekur. Ngjarja e rëndë ndodhi në lagjen nr 12, pranë biznesit të çiftit, i cili zotëronte një dyqan metrazhesh.

Viktima është identifikuar gjithashtu dhe ajo është Hajdije Tosuni, 59 vjeçare.

63 vjeçari është konfliktuar me të shoqen brenda dyqanit, në afërsi të sheshit ‘Azem Hajdari’ në Durrës. Më pas ka marrë një levë dhe e ka goditur për vdekje.

“Më datë 26.02.2020, rreth orës 11:35, në lagjen Nr. 12, Durrës, shtetasi R. T., 63 vjeç, banues në lagjen Nr. 7, Durrës, në dyqanin që tregton metrazhe, dyshohet se ka vrarë me levë hekuri, bashkëshorten e tij, shtetasen H. T., 59 vjeçe, e cila ka ndërruar jetë si pasojë e plagëve të marra.

Shërbimet e Policisë kanë arrestuar në flagrancë autorin e dyshuar të ngjarjes. Në vendngjarje ndodhet grupi hetimor, ku vijon punën për sqarimin dhe dokumentimin e ngjarjes.“-njofton policia.

Ky është rasti i dytë i vrasjes brenda në familje, teksa mbrëmjen e djeshme Fatmir Kolecaj i bëri pritë ish gruas Esmeralda Filopati 36 vjeçe, nënë e tre fëmijëve dhe vëllait të saj Vledison Filopati 34 vjeç. Të dy u qëlluan për vdekje me armë zjarri. Esmeralda dhe Fatmiri ishin divorcuar 3 vite më parë./Express