Basha: Banorët e Laçit ndihen të braktisur, kanë nevojë urgjente për ushqime dhe strehim

Gazeta Express

30/11/2019 16:37

Kreu i PD-së, Lulzim Basha shkruan se në qytetin e Laçit ka nevoja urgjente pas situatës me tërmetet.

Basha shprehet se ata prej 5 ditësh po i kalojnë netët jashtë dhe se ende nuk është dhënë një vendim për strehimin e tyre pasi banesat janë të pabanueshme.

“U riktheva sot në Laç për të parë gjendjen. Qindra qytetarë të dëmtuar nga tërmeti më thanë se prej pesë ditësh po i kalojnë netët jashtë, dhe po vuajnë një situatë të rëndë humanitare.

Banorët nuk kanë asnjë qartësi nëse mund të përdorin banesat të cilat duken të dëmtuara rëndë. Shumë prej tyre thanë se nuk ju është dhënë zgjidhje për strehim, megjithëse banesat e tyre janë të pabanueshme tashmë.

Prej ditësh askush nuk ka shkuar të shohë gjendjen ku ndodhen dhe dëmtimet që kanë në banesa. Gjithashtu ata thonë se nuk u është ofruar asnjë lloj ndihme tjetër në ushqime dhe rroba, gjë që e bën situatën shumë të rëndë për këto familje.

Duhet një reagim i menjëhershëm për ti ardhur në ndihmë këtyre familjeve që përveç traumës se shkatërrimit të gjithçka që kishin, janë dhe pa asnjë ndihmë e përkrahje.