Arsenali arrin marrëveshje me Newcastle për Bruno Guimaraes

Futboll

Gazeta Express

31/07/2026 12:38

Arsenali është shumë pranë realizimit të një prej transferimeve më të bujshme të merkatos së verës, pasi ka arritur marrëveshje me Newcastle United për mesfushorin brazilian Bruno Guimarães.

Sipas raportimit të L’Équipe, “Topçinjtë” kanë paraqitur një ofertë të re prej 75 milionë paundësh, plus bonuse, e cila është pranuar nga Newcastle.

Tashmë, gjithçka varet nga marrëveshja me vetë lojtarin dhe detajet përfundimtare të kontratës. Nëse palët arrijnë akordin në ditët në vijim, Bruno Guimarães do të zyrtarizohet shumë shpejt si futbollist i Arsenalit.

Mesfushori brazilian ka qenë prej kohësh një nga objektivat kryesorë të Arsenalit, ndërsa trajneri Mikel Arteta e sheh atë si një përforcim kyç për mesfushën, në prag të sezonit të ri.

Nëse transferimi kompletohet, Bruno Guimarães do të jetë një nga blerjet më të rëndësishme të Arsenalit dhe një nga marrëveshjet më të mëdha të kësaj merkatoje verore.