Argjentina po i bën presion Comos që mos ta përdorë Nico Pazin këtë fundjavë

Futboll

Gazeta Express

19/05/2026 20:41

Sipas raporteve të së martës, ka shqetësime në rritje në Argjentinë për gjendjen e Nico Pazit, ndërsa lajme nga Italia pretendojnë se kombëtarja argjentinase po ushtron presion mbi Comon që të mos e aktivizojë atë në ndeshjen vendimtare të Serie A këtë fundjavë.

Nico Pazi nuk ishte pjesë e skuadrës në fitoren 1-0 të Comos ndaj Parmës në Serie A të dielën.

Mesfushori i Argjentinës kishte luajtur në çdo ndeshje të ligës kur ka qenë i gatshëm më parë, duke munguar vetëm një herë për shkak pezullimi nga kartonët.

Para ndeshjes me Parmën, trajneri Cesc Fàbregas konfirmoi se Pazi nuk ishte i disponueshëm për shkak të një goditjeje në gju dhe pranoi se ai mund të mungojë edhe në dy ndeshjet e fundit të sezonit.

“Nico Paz është i dëmtuar, nuk do të jetë nesër kundër Parmës. Ka një goditje në gju. Nëse ndeshja do të luhej të hënën, ndoshta do të ishim në një situatë tjetër, por sinqerisht nuk mund të them nëse do të luajë edhe ndeshjen e fundit. Shpresoj, por nuk mund ta them me siguri”, tha ai.

Como ka edhe një ndeshje të mbetur këtë sezon në Serie A, në transfertë ndaj Cremoneses të dielën në orën 20:45, një ndeshje që do të vendosë nëse klubi do të kualifikohet në Ligën e Kampionëve apo në Ligën e Evropës sezonin e ardhshëm.

Aktualisht, Como ndodhet në vendin e pestë, dy pikë pas Romës në vendin e katërt, duke hyrë në javën e fundit të sezonit 2025/26.

Për të siguruar Ligën e Kampionëve, atyre u duhet që Roma të humbasë pikë ndaj Veronës.

Natyrisht, Fàbregasi dhe Como do të donin ta kishin lojtarin e tyre kryesor në dispozicion, por sipas raportimeve të “Calciomercato.com”, përfaqësuesit e Argjentinës po “ushtrojnë presion” që ai të mos luajë këtë fundjavë.

Kjo sepse Pazi shihet si një kandidat serioz për listën përfundimtare prej 26 lojtarësh të Lionel Scalonit për Kupën e Botës 2026 në Amerikën e Veriut, që nis pas disa javësh.

Sipas “ESPN” në Argjentinë, stafi i kombëtares do të dërgojë mjekë në Itali për të vlerësuar dëmtimin e tij. Ata besojnë se lëndimi nuk është serioz, por ekziston rreziku që situata të përkeqësohet nëse ai pëson një tjetër goditje ndaj Cremoneses këtë fundjavë./GazetaExpress/