Alvarez vazhdon të këmbëngulë për një largim nga Atletico

Futboll

Gazeta Express

23/06/2026 14:39

Julian Alvarez ka tronditur Atletico Madridin, pasi ka kërkuar publikisht largimin nga klubi gjatë kësaj vere. Sulmuesi argjentinas ka bërë të qartë se dëshiron një sfidë të re, ndërsa Barcelona po shihet si destinacioni i tij i ëndrrave.

26-vjeçari ka ndezur një betejë të madhe në merkato, pavarësisht se ka shkëlqyer që nga transferimi nga Manchester City në vitin 2024 për një shumë që shkoi deri në 95 milionë euro. Alvarez është ende nën kontratë me Atleticon deri në qershor të vitit 2030, por ai beson se largimi do të ishte zgjidhja më e mirë për të gjitha palët.

Barcelona e ka vendosur argjentinasin në krye të listës së dëshirave për sulmin, sidomos pas largimit të Robert Lewandowskit, i cili ka lënë një boshllëk të madh në repartin ofensiv.

Alvarez: Dua të përmbush ëndrrën time

Pas fitores 2-0 të Argjentinës ndaj Austrisë në Kupën e Botës, Alvarez foli hapur për situatën e tij.

“Nuk mendoj se është momenti i duhur për të folur, por nuk dua as të fshihem. Mundohem të jem një person i sinqertë. Kam folur me njerëzit te Atletico me të cilët duhej të flisja. Mendoj se gjëja më e mirë për të gjithë është një transferim. Dua të përmbush ëndrrën time”, tha ai për ESPN.

Gara për nënshkrimin e tij

Barcelona konsiderohet favorite për transferimin e Alvarezit, por Atletico Madrid ndodhet në një pozicion të fortë negociues për shkak të kontratës afatgjatë të lojtarit.

Sipas raportimeve, edhe Paris Saint-Germain dhe Arsenal janë të interesuara për sulmuesin, ndërsa Real Madrid thuhet se ka parë t’i refuzohet një ofertë marramendëse prej 150 milionë eurosh.

Situata ka shkaktuar tension të madh prapa skenave, me Atletico Madridin që ka reaguar ashpër ndaj Barcelonës për rrjedhje të dyshuara informacioni në media dhe mungesë respekti.

Përplasje e madhe në merkato

Tani pritet një betejë e fortë mes klubeve, pasi Alvarez dëshiron të shtyjë përpara transferimin e tij të preferuar, ndërsa Atletico nuk ka ndërmend ta lejojë lehtë largimin te një rival vendas.

Për Barcelonën, zgjidhja e këtij ngërçi është prioritet, pasi klubi katalanas kërkon të veprojë shpejt përpara se interesimi i klubeve të tjera të mëdha evropiane ta rrisë edhe më shumë çmimin e sulmuesit argjentinas. /GazetaExpress/