UEFA me reagim të ashpër ndaj Gianni Infantinos

Futboll

Gazeta Express

28/07/2026 23:16

UEFA ka reaguar ashpër pasi u zbuluan planet e presidentit të FIFA-s, Gianni Infantino, për të shitur aksione në aktivitetet komerciale të Kupës së Botës.

Infantino është përballur me kritika të shumta pas Kupës së Botës në Amerikën e Veriut dhe së fundmi mbajti një fjalim të ashpër kundër “atyre që fshihen pas stilolapsave dhe letrave”, të cilët sipas tij “po përhapin urrejtje dhe thashetheme të rreme”.

Megjithatë, kreu i FIFA-s, i cili është ftuar të paraqitet para një komiteti në Shtetet e Bashkuara për shkak të marrëdhënies së tij me Donald Trump, ka shkaktuar edhe më shumë polemika pasi raportimet pretenduan se ai po kërkon të shesë aksione në operacionet komerciale dhe të eventeve të FIFA-s.

Financial Times dhe The Times raportuan lajmin, i cili më pas u konfirmua edhe nga FIFA. Organizata pranoi se do të “ftojë palë të treta të bëjnë investime minoritare, pa të drejtë kontrolli” në një degë të re të quajtur FIFA Forward Enterprise (FFE).

Kjo degë e re mund të ketë një vlerë prej rreth 15 miliardë funtesh, ndërsa projekti FIFA Forward Enterprise synon të mbledhë 3.16 miliardë funte nga investitorët përmes kompeticioneve të saj më të rëndësishme.

Nëse plani miratohet, gjë që pritet të vendoset me votën e të 211 federatave anëtare në Kongresin e FIFA-s në mars, kompania amerikane e kapitalit sipërmarrës Thrive Eternal, e themeluar nga vëllai i Joshua Kushner, kunatit të Donald Trump, pritet të udhëheqë procesin e investimeve private.

Infantino deklaroi se “disa pjesë të futbollit e kanë shndërruar popullaritetin e tij në një vlerë të jashtëzakonshme komerciale dhe ne e festojmë këtë sukses, sepse ai ndihmon të gjithë futbollin”.

Ai shtoi se ky projekt “ka të bëjë me demokratizimin e futbollit në mbarë botën”, në mënyrë që të gjitha federatat të përfitojnë në mënyrë të drejtë nga të ardhurat.

Sipas The Times, Infantino mund të përfitojë personalisht dhjetëra miliona funte nëse plani realizohet.

Megjithatë, UEFA nuk e ka pritur aspak mirë këtë iniciativë dhe beson se FIFA po kalon një kufi që nuk duhet të kalohet.

“Ky është një kufi që institucionet drejtuese të futbollit nuk duhet ta kalojnë kurrë,” thuhet në deklaratën e ashpër të UEFA-s.

“UEFA e merr këtë çështje jashtëzakonisht seriozisht.

“Ashtu duhet të bëjë çdo Federatë Kombëtare e Futbollit. Ashtu duhet të bëjë çdo palë e interesuar: ligat, klubet, lojtarët, tifozët, qeveritë dhe kushdo që kujdeset për të ardhmen e futbollit.

“Shpirti dhe qeverisja e futbollit nuk janë asete që mund të tregtohen, veçanërisht kur nuk ka asnjë transparencë se kush përfiton financiarisht. Askush prej nesh nuk është pronar i futbollit. Nuk është pronë e FIFA-s për ta shitur.”

Infantino është president i FIFA-s që nga viti 2016 dhe aktualisht ndodhet në mandatin e tij të tretë. Ai mund të qëndrojë në detyrë deri në vitin 2031, ndërsa mbi 200 federata anëtare e kanë mbështetur dhe ai ka sinjalizuar se synon të kandidojë pa kundërshtar edhe për një mandat të katërt në vitin 2027.

Sipas The Times, presidenti i UEFA-s, Aleksander Čeferin, bojkotoi Kupën e Botës në shenjë proteste ndaj vendimit për të pezulluar kartonin e kuq të sulmuesit të Shteteve të Bashkuara, Folarin Balogun, të marrë në ndeshjen kundër Bosnjë dhe Hercegovinës.

Në një vendim shumë të diskutueshëm, sulmuesi i Monacos u lejua të luante në ndeshjen e fazës së 1/16-ave kundër Belgjikës, pasi pezullimi i kartonit të kuq u anulua për një vit.

Donald Trump pranoi se kishte biseduar me Infantinon dhe FIFA-n për këtë rast, duke deklaruar se sipas tij “nuk ishte faull”.

UEFA akuzoi FIFA-n se kishte “kaluar vijën e kuqe”, duke marrë një vendim “të pakuptueshëm dhe të pajustifikueshëm”.

Čeferin, i cili ishte i pranishëm në ndeshjen mes Meksikës dhe Afrikës së Jugut, vendosi të mos e ndiqte nga afër finalen e Kupës së Botës.

Gjithashtu, raportohet se ai mbeti i pakënaqur edhe nga vendimi i autoriteteve amerikane për të ndaluar hyrjen në vend të gjyqtarit somalez Omar Artan për Kupën e Botës dhe më pas e emëroi atë si arbitrin kryesor të Superkupës së UEFA-s mes Paris Saint-Germain dhe Aston Villës./GazetaExpress/