Ecja pas operacionit ndihmon shumë shëndetin

Keshilla Mjekësore

Gazeta Express

11/05/2026 18:40

Pacientët që nisin të ecin pas një ndërhyrjeje kirurgjikale mund të ulin ndjeshëm rrezikun e komplikimeve dhe të rikthimit në spital, sugjeron një studim i ri.

Sipas hulumtimit, për çdo 1 mijë hapa shtesë në ditë pas operacionit, gjasat për komplikime ulen me 18 për qind, rreziku për t’u shtruar sërish në spital bie me 16 për qind, ndërsa qëndrimi në spital shkurtohet me 6 për qind.

Studimi, i botuar në Journal of the American College of Surgeons, analizoi të dhënat e gati 2 mijë pacientëve që iu nënshtruan operacioneve me shtrim në spital. Lidhja mes ecjes dhe rikuperimit më të mirë u vu re në lloje të ndryshme ndërhyrjesh kirurgjikale, pavarësisht gjendjes së përgjithshme shëndetësore të pacientëve.

Një element i rëndësishëm i studimit ishte se faktorë si rrahjet fillestare të zemrës apo vlerësimi personal i mirëqenies nga vetë pacientët nuk parashikonin rezultate më të mira pas operacionit. Sipas ekspertëve, kjo sugjeron se ecja mund të luajë rol të drejtpërdrejtë në rikuperim dhe nuk është thjesht shenjë se pacienti ka qenë më i shëndetshëm që në fillim.

Profesori Timothy Pawlik, autori kryesor i studimit dhe drejtues i kirurgjisë në Ohio State University Wexner Medical Center në SHBA, e përshkroi situatën si një dilemë “pula apo veza”. Njerëzit që ndihen më mirë, natyrisht, kanë më shumë gjasa të ngrihen dhe të lëvizin. Por, sipas tij, sinjali është aq i fortë sa tregon se numri i hapave nuk është vetëm tregues i mirëqenies, por pjesë e rëndësishme e saj.

Ai shtoi se rënia e numrit të hapave te një pacient mund të jetë shenjë e hershme për ndërhyrje, për shembull duke përfshirë fizioterapinë ose duke e monitoruar më shpesh gjendjen e tij.

Ekspertët mendojnë se provat në rritje mund të ndryshojnë mënyrën se si pacientët ndiqen dhe trajtohen pas operacionit. Aktualisht, mjekët zakonisht u thonë pacientëve se duhet të ngrihen dhe të ecin pas ndërhyrjes, por shpesh nuk kanë një ide të qartë se sa realisht po lëvizin ata.

Pajisjet e veshshme, si orët inteligjente ose Fitbit, mund ta ndryshojnë këtë. Ato ofrojnë të dhëna objektive dhe të vazhdueshme për lëvizjen e pacientit. Në vend që mjekët të mbështeten vetëm te pyetja “si ndiheni?”, mund të shohin nëse pacienti po ngrihet dhe po lëviz, një sinjal praktik dhe i dobishëm për ecurinë e rikuperimit. /GazetaExpress/