Këshilla që duken të rreme, por që në fakt nuk janë

Keshilla Mjekësore

Gazeta Express

11/05/2026 18:41

Disa këshilla shëndetësore duken aq të pazakonta, sa në fillim është e lehtë të dyshosh në to.

Por, sipas farmacistit Craig Watt, drejtor farmacie në Superdrug, disa prej këtyre fakteve më pak të njohura mbështeten në shpjegime shkencore dhe mund të ndihmojnë në menaxhimin e problemeve të përditshme, nga era e keqe e gojës deri te alergjia sezonale.

Një nga këshillat kryesore lidhet me mënyrën se si merren tabletat. Edhe pse dikujt mund t’i duket e natyrshme të shtrihet menjëherë pas ilaçit, sidomos kur është sëmurë, kjo mund të shkaktojë më shumë dëm sesa dobi. Disa tableta mund të mbeten përkohësisht në ezofag, në vend që të kalojnë shpejt në stomak, duke shkaktuar irritim, parehati ose një ndjesi djegieje të njohur si ezofagit nga pilulat.

Sipas Watt, kjo mund të ndodhë më shpesh me disa antibiotikë, ilaçe kundër inflamacionit dhe trajtime për osteoporozën. Për këtë arsye, rekomandohet që ilaçet të merren me një gotë të plotë ujë dhe trupi të mbahet drejt. Për disa barna këshillohet të qëndrohet ulur ose në këmbë për rreth 30 minuta, në mënyrë që të ulet rreziku i irritimit.

Një tjetër këshillë që mund të duket kundërintuitive lidhet me alergjinë sezonale. Kur moti është i ngrohtë, shumë njerëz hapin dritaret për ajër të freskët. Por kjo mund të përkeqësojë simptomat e hay fever-it, sepse poleni hyn lehtësisht në shtëpi dhe vendoset mbi sipërfaqe, çarçafë, perde dhe mobilie të buta.

Nivelet e polenit shpesh janë më të larta herët në mëngjes dhe në mbrëmje. Pasi futet brenda, poleni mund të qëndrojë aty dhe të vazhdojë të shkaktojë teshtima, kruarje sysh dhe bllokim hundësh edhe kur personi ndodhet në ambiente të mbyllura. Mbajtja e dritareve të mbyllura në oraret kur poleni është më i lartë, veçanërisht në dhomën e gjumit, mund të ndihmojë në krijimin e një ambienti me më pak alergjenë.

Syzet e diellit nuk shërbejnë vetëm për të mbrojtur sytë. Drita e fortë mund të nxisë ose përkeqësojë dhimbjet e kokës dhe migrenën te njerëzit e ndjeshëm ndaj ndriçimit. Prandaj, mbajtja e syzeve të diellit mund të ulë ekspozimin ndaj shkëlqimit dhe të ndihmojë në parandalimin e dhimbjeve të shkaktuara nga drita e fortë.

Watt thekson se rreth 80 për qind e personave me migrenë përjetojnë ndjeshmëri ndaj dritës, e njohur si fotofobi, gjatë një krize. Kjo nuk lidhet vetëm me një lloj migrene, por mund të shfaqet në forma të ndryshme, përfshirë migrenën me aurë dhe atë vestibulare.

Një nga mënyrat më të thjeshta për të luftuar erën e keqe të gojës është hidratimi. Era e keqe nuk lidhet gjithmonë vetëm me higjienën orale; shpesh ajo përkeqësohet nga tharja e gojës. Pështyma ndihmon në largimin e grimcave të ushqimit dhe baktereve. Kur goja është e thatë, bakteret shumohen më lehtë dhe krijojnë aromë të pakëndshme.

Një studim korean i vitit 2021, ku vullnetarët u krahasuan në gjendje dehidratimi, hidratimi normal dhe mbihidratimi, gjeti lidhje mes dehidratimit, prodhimit më të ulët të pështymës dhe niveleve më të larta të komponimeve të squfurit, që janë përgjegjëse për erën e rëndë të gojës. Për këtë arsye, pirja e mjaftueshme e ujit gjatë ditës mund të jetë një ndihmë e thjeshtë, krahas larjes së dhëmbëve, përdorimit të fillit dentar dhe kontrolleve të rregullta te dentisti.

Edhe veshja mund të ndikojë në pickimet nga mushkonjat. Sipas ekspertëve, ngjyrat e errëta si e zeza, bluja e errët dhe e kuqja mund t’i tërheqin më shumë mushkonjat, sepse dallohen më lehtë prej tyre, sidomos në ndriçim të ulët. Megjithatë, ngjyra e rrobave është vetëm një nga faktorët; nxehtësia e trupit, aroma dhe dioksidi i karbonit që nxjerrim gjatë frymëmarrjes luajnë gjithashtu rol.

Për t’u mbrojtur më mirë, këshillohen rroba më të lirshme, që krijojnë një pengesë fizike dhe e bëjnë më të vështirë që mushkonjat të arrijnë lëkurën. Kështu, edhe një zgjedhje në dukje e vogël në veshje mund të ndihmojë në uljen e pickimeve gjatë ditëve të ngrohta. /GazetaExpress/