Obeziteti lidhet me më shumë lloje kanceri

Keshilla Mjekësore

Gazeta Express

29/04/2026 20:57

Një studim i ri zbulon se lidhja mes obezitetit dhe kancerit është edhe më e fortë nga sa mendohej, duke treguar se mbi gjysma e pacientëve me kancer kanë pasur histori mbipeshë gjatë jetës së tyre.

Studiues nga Universiteti i Oksfordit kanë gjetur se obeziteti lidhet me të paktën 13 lloje kanceri, përfshirë kancerin e gjirit, zorrës, pankreasit dhe veshkave. Sipas tyre, vlerësimi i pacientëve vetëm në momentin e diagnostikimit nuk pasqyron të gjithë historinë shëndetësore, pasi shumë prej tyre mund të kenë qenë obezë më herët në jetë.

Studimi, i cili përfshiu mbi 79 mijë pacientë, tregoi se kur merret parasysh historia e plotë e peshës, mbi 50% e pacientëve me këto lloje kanceri kanë pasur obezitet në një moment të jetës. Ndërsa nëse merret parasysh vetëm pesha në fillim të trajtimit, kjo shifër bie në rreth 25%.

Ekspertët theksojnë se edhe humbja e peshës nuk e eliminon plotësisht rrezikun, pasi efektet e obezitetit mund të kenë ndikim afatgjatë në organizëm. Kjo mund të ndikojë edhe në suksesin e trajtimit dhe prognozën e sëmundjes.

Shkencëtarët besojnë se obeziteti rrit rrezikun për kancer përmes proceseve si inflamacioni kronik, ndryshimet hormonale dhe çrregullimet metabolike.

Gjetjet theksojnë nevojën për të luftuar obezitetin që në fazat e hershme dhe për të marrë parasysh historinë e plotë të peshës në vendimmarrjet mjekësore. Sipas ekspertëve, kjo qasje mund të ndihmojë në trajtime më të personalizuara dhe më efektive për pacientët me kancer. /GazetaExpress/