Një antidepresantë tërhiqet nga tregu në Britani

Keshilla Mjekësore

Gazeta Express

29/04/2026 20:49

Autoritetet shëndetësore kanë lëshuar një paralajmërim urgjent për pacientët që përdorin antidepresantë, pas zbulimit të një gabimi në prodhim që ka çuar në paketim të pasaktë të medikamenteve.

Sipas Agjencisë për Rregullimin e Barnave dhe Produkteve Shëndetësore në Mbretërinë e Bashkuar (MHRA), disa paketime të ilaçit sertralinë mund të përmbajnë tableta të një medikamenti tjetër, citalopram.

Të dyja i përkasin grupit të inhibitorëve selektivë të rimarrjes së serotoninës (SSRI), që përdoren për trajtimin e depresionit dhe ankthit, por marrja e gabuar e tyre mund të shkaktojë efekte anësore serioze.

Kompania Amarox Limited ka tërhequr një seri të sertralinës 100 mg (me afat skadence maj 2028 dhe numër serie V2500425), duke u kërkuar pacientëve të kontrollojnë me kujdes paketimet e tyre. Në rast se brenda kutisë gjenden tableta të shënuara si citalopram 40 mg, pacientët duhet të kontaktojnë menjëherë farmacistin.

Ekspertët paralajmërojnë se përdorimi i gabuar i këtyre barnave mund të shkaktojë simptoma si të përziera, dhimbje koke, çrregullime të gjumit dhe ankth të shtuar.

Deri më tani është raportuar një rast i vetëm me efekte anësore, ndërsa autoritetet kanë kërkuar që farmacistët të kontaktojnë pacientët e prekur dhe të tërheqin produktet nga përdorimi.

Pacientët që kanë marrë saktësisht sertralinë nuk kanë nevojë të ndërmarrin veprime shtesë, por grupet më të ndjeshme – si personat mbi 65 vjeç, të rinjtë nën 18 vjeç dhe ata me probleme të zemrës ose mëlçisë – këshillohen të tregojnë kujdes të shtuar.

Autoritetet u bëjnë thirrje pacientëve dhe profesionistëve të shëndetit të raportojnë çdo efekt anësor dhe të ndjekin udhëzimet për të shmangur rreziqet. /GazetaExpress/