Hamza: Opsionet tona për President s’janë marrë në konsideratë nga LVV, Osmani mund të zgjidhej me votat e LVV-së e LDK-së

Lajme

Gazeta Express

27/04/2026 16:58

Kryetari i Partisë Demokratike të Kosovës, Bedri Hamza, tha se çështja e Presidentit konsiderohet si “temë e mbyllur” për PDK-në.

Ai tha nga holli i Kuvendit se kanë dhënë opsione për të bërë zgjidhje si marrëveshje gjithpërfshirëse politike dhe se kjo s’është marrë parasysh.

“Kemi qenë të gatshëm për emër konsensual, kemi bërë propozimin tonë – nuk është marrë seriozisht në konsideratë”, tha ai.

Hamza tha se ka “mungesë serioziteti” në mënyrën se si Lëvizja Vetëvendosje po e trajton këtë çështje.

“Ne kemi ardhë në përfundim, dhe në kuadër të Këshillit Drejtues të Partisë Demokratike të Kosovës, kjo temë konsiderohet si temë e mbyllur dhe e përmbyllur. I urojmë sukses në zgjedhjen e Presidentit me 98 deputetë tjerë të Kuvendit të Republikës së Kosovës”, tha ai.

“Deri tash i kemi zyrtarisht dy kandidatë. Kanë deklaruar që nuk do të ketë kandidatë politikë. Të dy kandidatët janë në fakt nga Lëvizja Vetëvendosje”, tha Hamza.

I pyetur për emrin e Vjosa Osmanit, ai tha se ajo mund të rizgjidhej Presidente me votat e LVV-së dhe LDK-së, “ndoshta edhe të deputetëve tjerë”.

Prapë është situatë hipotetike, por po përgjigjem. Po që se LDK-ja e sjell Vjosa Osmanin dhe zonja Osmani është kandidate për Presidente, mund të zgjidhet me votat e Lëvizjes Vetëvendosje dhe Lidhjes Demokratike të Kosovës, ndoshta edhe deputetëve tjerë të Kuvendit të Republikës së Kosovës”.