Edhe gjyqtarë tjerë janë nën hetim, në skandalin e Rocchit në Itali

Futboll

Gazeta Express

27/04/2026 16:41

Gjyqtarët Luigi Nasca, Rodolfo Di Vuolo dhe Daniele Paterna janë vënë nën hetim së bashku me Gianluca Rocchin dhe Andrea Gervasonin, ndërsa numri i personave të përfshirë në skandalin e fundit në Serie A mund të rritet “ndjeshëm” në orët në vijim, sipas raportimeve nga Italia.

Burime italiane, përfshirë “La Gazzetta dello Sport”, raportojnë se tre gjyqtarë janë nën hetim pasi më parë u përfshinë në çështje edhe Rocchin, si përgjegjës për caktimin e gjyqtarëve, dhe mbikëqyrësi i VAR-it, Gervasoni.

Sipas raportimeve, Nasca, Di Vuolo dhe Paterna dyshohen se kanë dhënë informacione të rreme te prokuroria.

Paterna është shfaqur në një video ku pretendohet se një person jashtë dhomës së VAR-it u jepte udhëzime zyrtarëve se çfarë t’i thoshin gjyqtarit në fushë, në një shkelje të hapur të protokollit.

Hetuesit besojnë se zyrtarët e VAR-it janë ndikuar nga persona jashtë dhomës së kontrollit, madje edhe përmes mesazheve të koduara, duke minuar pavarësinë e vendimmarrjes së tyre.

Sipas “Gazzettas”, numri i personave nën hetim mund të rritet ndjeshëm në orët në vijim.

Prokuroria e Milanos do të marrë në pyetje Rocchin dhe Gervasonin më 30 prill.

Avokati i Rocchit, Antonio D’Avirro, ka dhënë disa intervista për mediat italiane, duke këmbëngulur se klienti i tij po përballet me një padrejtësi.

“E takova dhe është i demoralizuar, sepse beson se është viktimë e një padrejtësie,” tha D’Avirro për “Pressing”.

“Ai i konsideron të gjitha akuzat si të pabazuara. Ai gjithmonë ka vepruar me besnikëri dhe transparencë dhe është shumë i shqetësuar që akuzohet për diçka kaq serioze”, tha ai fillimisht.

“Nuk e di nëse do të rikthehet, por sigurisht që do të jemi në gjendje të mbrohemi në mënyrë efektive. Aktualisht po vlerësojmë strategjitë mbrojtëse që do të ndjekim deri të enjten”, shtoi ai.

Rocchi ka pezulluar veten nga detyra ndërkohë që është nën hetim për pjesëmarrje në mashtrim sportiv.

“Përmenden edhe persona të tjerë, por nuk e dimë kush janë,” shtoi D’Avirro për “Sport Mediaset”.

“Bëhet fjalë për një vepër me shumë persona të përfshirë, por vetëm Rocchi është përmendur në njoftimin për hetim”, vazhdoi ai.

“Calciopoli? Kjo është një çështje krejt tjetër. Atëherë ishin të përfshirë qindra persona rreth klubeve, ndërsa këtu bëhet fjalë vetëm për dy ose tre individë”, e mbylli ai./GazetaExpress/