Bëhet viral momenti kur volejbollisti japonez kërkon falje në mënyrë ‘esktreme’, pasi goditi me top gjyqtaren

Sporte tjera

Gazeta Express

02/02/2026 17:20

Në një moment interesante që është shpërndarë gjerësisht në internet, lojtari japonez, Yuji Nishida shfaqi aftësi madhështore rrëshqitjeje, duke e çuar një ndjesë tradicionale në ekstrem pasi goditi pa dashje me top një gjyqtare anësore gjatë fundjavës.

26-vjeçari, i cili po merrte pjesë në një sfidë shërbimi në pushimin e pjesës së parë në një event “all-star” të volejbollit në Kobe, në perëndim të Japonisë, u duk i tmerruar kur shërbimi i tij me dorën e majtë doli jashtë fushës dhe e goditi gjyqtaren femër drejt e në shpinë.

Në momentin që gjyqtarja, e cila nuk ishte lënduar, rimori qetësinë, trupi 186 cm i Nishidës po rrëshqiste me shpejtësi drejt saj mbi tokë, me kokën poshtë dhe duart anash, duke shkaktuar të qeshura dhe duartrokitje nga spektatorët dhe bashkëlojtarët e tij.

Por Nishida nuk u ndal me kaq. Ai u ul në gjunjë dhe vazhdoi të përkulej vazhdimisht, duke bashkuar në një moment edhe shuplakat e duarve. Përkuljet vazhduan edhe pasi u ngrit në këmbë dhe nxitën një gjest të ngjashëm nga gjyqtarja, e cila buzëqeshte, disi e turpëruar.

Pamjet e skenës kanë tërhequr miliona shikime në rrjetet sociale. Një tifoz e quajti veprimin e Nishidës një “vepër arti”, ndërsa një tjetër tha se “përulja e tij me rrëshqitje” i ngjante një forme njerëzore të sportit të curlingut.

A Japanese volleyball player is going viral for his dramatic apology after hitting someone with his serve

pic.twitter.com/FrW266qOt1

— The Macro Memo (@TheMacroMemo_) February 2, 2026

Komentatorët televizivë u pyetën nëse fërkimi i kishte djegur kokën kapitenit të Osaka Bluteon, ndërsa një tjetër e krahasoi pamjen e tij me atë të një “tune të sapo zbarkuar”.

Larg momentit që u pa në mbarë botën, Nishida shkëlqeu edhe në fushë, duke ndihmuar ekipin e tij drejt një fitoreje 3-0 dhe duke fituar çmimin MVP të turneut, sipas “AbemaTV”, shërbimit transmetues që e pasqyroi turneun.

Edhe në një vend ku një ndjesë e sinqertë ka shumë peshë, “mea culpa” e Nishidës ishte një shembull ekstrem.

Forma më e ekzagjeruar në kulturën japoneze është dogeza, e cila mund të përdoret edhe për të shprehur respekt të thellë.

Kur përdoret si ndjesë, personi në faj shtrihet për tokë dhe përkulet derisa balli i tij të prekë dyshemenë mes duarve.

Edhe pse dogeza shihet rrallë në publik, politikanë të përfshirë në skandale kanë përdorur gjeste po aq teatrale për të komunikuar pendesën e tyre./GazetaExpress/