Inaki Williams reagon ashpër për ndeshjet e Superkupës spanjolle në Arabinë Saudite

Futboll

Gazeta Express

31/12/2025 0:00

Kapiteni i Athletic Club, Iñaki Williams, ka dalë hapur kundër vendimit që Superkupa e Spanjës të zhvillohet në Arabinë Saudite, duke e ashpërsuar edhe më shumë qëndrimin e tij krahasuar me deklaratat e mëparshme.

Nuk është hera e parë që sulmuesi shpreh pakënaqësinë, por këtë herë fjalët e tij kanë qenë veçanërisht të drejtpërdrejta.

Prej gjashtë sezonesh radhazi, ky kompeticion organizohet në Arabinë Saudite, pas marrëveshjes së Federatës Spanjolle të Futbollit (RFEF) me autoritetet saudite.

Kjo marrëveshje i sjell federatës rreth 40 milionë euro në vit, të ardhura që RFEF pretendon se investohen në futbollin bazë.

Megjithatë, kritikat kanë qenë të shumta, sidomos për faktin se ndeshjet shpesh zhvillohen në stadiume gjysmë bosh dhe atmosfera anon qartazi në favor të Real Madridit dhe Barcelonës.

Sulmuesi 31-vjeçar foli për mediat përpara ndeshjes kundër Osasunës të shtunën, përpara se Athletic të udhëtojë drejt Xhedahut, ku do të përballet me Barcelonën në gjysmëfinalen e parë të Superkupës, të mërkurën.

“E kam thënë shumë herë dhe nuk kam ndërmend të hesht për këto çështje. Për mua, të luash në Arabinë Saudite është diçka shumë negative, për të mos përdorur fjalë më të rënda. Ta zhvendosësh një kompeticion kombëtar në një vend tjetër është shumë e vështirë për tifozët, sidomos për udhëtimet. Për ne, me një bazë kaq të madhe tifozësh, është sikur luajmë gjithmonë jashtë fushe. Po të zhvillohej këtu, të gjithë e dimë sa mbështetës të Athletic do të ishin në tribuna,” deklaroi Williams për “MD”.

Për Williamsin personalisht, ky udhëtim vjen në një moment shumë delikat, pasi është në prag të bëhet baba.

Nëse Athletic arrin në finale, ai do të qëndrojë larg familjes për rreth një javë, menjëherë pas lindjes së fëmijës.

“Jam gati të bëhem baba në ditët në vijim. Të detyrohesh të lësh gruan dhe djalin këtu nuk është aspak e lehtë, por është pjesë e profesionit. Jam në dispozicion të klubit dhe do të përpiqem të jap maksimumin në Superkupë,” shtoi ai.

Pavarësisht kritikave të forta nga Williams, nuk ka shenja se Real Madrid, Barcelona apo vetë RFEF janë të gatshëm ta rikthejnë kompeticionin në Spanjë. Arsyeja kryesore mbetet aspekti financiar, pasi federata tashmë po diskuton një zgjatje të marrëveshjes aktuale me Arabinë Saudite, e cila është e vlefshme deri në vitin 2029, edhe për pesë vite të tjera./GazetaExpress/