Zvicra po rritet më shpejt se pjesa më e madhe e Evropës

Lajme

Gazeta Express

25/05/2026 10:39

Debati për migracionin dhe rritjen e popullsisë në Zvicër po intensifikohet, ndërsa vendi po përballet me një nga ritmet më të larta të rritjes demografike në Evropë.

Sipas analizave të fundit, Zvicra është ndër shtetet që vazhdon të fitojë banorë, në një kohë kur shumë vende evropiane po përballen me plakje të popullsisë dhe rënie demografike, transmeton albinfo.ch.

Aktualisht, Zvicra ka rreth 9.1 milionë banorë dhe parashikimet zyrtare tregojnë se deri në vitin 2050 popullsia mund të arrijë mbi 10 milionë. Rritja po nxitet kryesisht nga migracioni i fuqisë punëtore, sidomos nga vendet e Bashkimit Evropian.

Kjo situatë ka hapur debat të madh politik në vend. Mbështetësit e iniciativës “Jo një Zvicër me 10 milionë banorë” argumentojnë se infrastruktura, tregu i banesave dhe trafiku janë nën presion të madh. Nga ana tjetër, kundërshtarët paralajmërojnë se ekonomia zvicerane varet ndjeshëm nga punëtorët e huaj dhe kufizimet e ashpra mund të shkaktojnë mungesë të fuqisë punëtore.

Në nivel evropian, Zvicra renditet mes vendeve me rritjen më të shpejtë të popullsisë, krahas shteteve si Irlanda, Luksemburgu dhe Holanda, ndërsa shumë vende të Evropës Lindore dhe Jugore po humbin banorë për shkak të emigrimit dhe lindshmërisë së ulët.