Zbulohen prapaskenat: Real Madridi dështoi në bisedimet për Rodrin, Barcelona futet fuqishëm në garë

Futboll

Gazeta Express

06/08/2026 17:57

Saga e së ardhmes së Rodrit po merr një kthesë të re, ndërsa Barcelona është futur zyrtarisht në garë për mesfushorin e Manchester Cityt.

Sipas gazetarit të njohur të merkatos, Fabrizio Romano, Real Madridi kishte nisur bisedimet me Manchester Cityn javën e kaluar, por palët nuk arritën të gjenin një marrëveshje.

Klubi madrilen ishte i gatshëm të ofronte rreth 50 milionë euro për kartonin e mesfushorit spanjoll, ndërsa Manchester City nuk e pranoi ofertën, duke preferuar të priste dhe të merrte më shumë kohë për të shqyrtuar situatën.

Ndërkohë, Barcelona ka hyrë tashmë në garë dhe ka marrë një sinjal pozitiv nga vetë lojtari. Sipas Romanos, Rodri u ka dhënë dritën jeshile katalanasve për të bërë lëvizjen e tyre, duke i hapur rrugën negociatave me kampionët e Anglisë.

Ky zhvillim mund të ndryshojë plotësisht rrjedhën e një prej transferimeve më të rëndësishme të kësaj vere, me Barcelonën që tashmë shihet si një pretendente serioze për firmën e 30-vjeçarit.

Mbetet të shihet nëse katalanasit do të arrijnë marrëveshjen me Manchester Cityn dhe do të finalizojnë një transferim që do të përforconte ndjeshëm repartin e mesfushës për sezonin e ri.