Unitedi i hapë bisedimet me klubin e lojtarit që kushton gati 100 milionë euro

Futboll

Gazeta Express

08/06/2026 21:00

Manchester Unitedi ka hapur zyrtarisht negociatat me West Ham United për mesfushorin Mateus Fernandesin, teksa klubi po përshpejton planet për rindërtimin e skuadrës gjatë afatit kalimtar veror.

Pas largimit të Casemiros, “Djajtë e Kuq” janë të vendosur të rinovojnë repartin e mesfushës nën drejtimin e trajnerit Michael Carrick.

Departamenti i rekrutimit të Manchester Unitedit e ka vendosur mesfushën qendrore si prioritetin kryesor të merkatos.

Klubi ka mbetur me një boshllëk të madh pas largimit të Casemiros, i cili zhvilloi ndeshjen e tij të fundit me fanellën e Unitedit kundër Nottingham Forestit në “Old Trafford”.

Në ndeshjen e fundit të sezonit kundër Brighton & Hove Albionit, Kobbie Mainoo dhe Mason Mount u përdorën si një dyshe e improvizuar në qendër të mesfushës, ndërsa Manuel Ugarte pritet gjerësisht të largohet pasi ka humbur rëndësinë në skuadër.

Sipas “Roundtable”, Unitedi ka nisur bisedime formale me West Hamin për të shqyrtuar kushtet financiare të nevojshme për transferimin e Fernandesit.

Futbollisti vlerësohet shumë dhe thuhet se është i entuziazmuar për mundësinë e një transferimi në “Old Trafford”, por negociatat mund të komplikohen nga situata administrative te West Hami.

Klubi londinez po kalon një periudhë të trazuar pas largimit të bashkëpronarit afatgjatë David Sullivan, gjë që ka krijuar vonesa në proceset e zakonshme të merkatos.

Interesimi për Fernandesin mbështetet fuqishëm nga Carricku, i cili pritet të ketë rol të rëndësishëm në strategjinë e transferimeve këtë verë.

Trajneri anglez e pëlqen shumë lojtarin dhe beson se ai ka profilin e duhur për të modernizuar një mesfushë që për vite është mbështetur te futbollistë me përvojë.

Megjithatë, drejtuesit e Manchester Unitedit kanë vendosur kufij të qartë financiarë.

Klubi nuk ka ndërmend të paguajë 98 milionë euro, aq sa raportohet nga Fabrizio Romano se kërkon West Hami për kartonin e Fernandesit, dhe nuk dëshiron të përfshihet në një sagë të gjatë e publike transferimi gjatë gjithë verës./GazetaExpress/