United nis bisedimet për Ismaïla Sarr

Futboll

Gazeta Express

02/07/2026 14:19

Manchester United ka nisur bisedimet për transferimin e sulmuesit të Crystal Palace, Ismaïla Sarr, menjëherë pas eliminimit të Senegalit nga Kupa e Botës.

Sipas raportimeve nga Anglia, “Djajtë e Kuq” janë në kërkim të përforcimeve për sezonin e ri, sidomos pas kualifikimit në Champions League. United kërkon një lojtar të gjithanshëm në sulm, që mund të luajë në disa pozicione, dhe Sarr shihet si profil ideal.

Klubi anglez tashmë ka arritur marrëveshje prej 35 milionë paundësh për mesfushorin brazilian Ederson nga Atlanta, por ende dëshiron të shtojë cilësi në repartin ofensiv.

Sarr zhvilloi sezonin më të mirë të karrierës me Crystal Palace, duke shënuar 20 gola në të gjitha garat dhe duke ndihmuar skuadrën të fitojë UEFA Conference League. Ai u shpall edhe lojtari më i mirë i sezonit te Palace, pas nëntë golave në Premier League.

Paraqitjet e tij në Kupën e Botës ia kanë rritur edhe më shumë vlerën. Me Senegalin, Sarr luajti në rol qendror, duke realizuar katër gola dhe një asistim. Senegali u eliminua në mënyrë dramatike nga Belgjika, pasi kishte udhëhequr 2-0, por u përmbys 3-2 pas vazhdimeve.

Crystal Palace nuk pritet ta lëshojë lehtë lojtarin. Sarr u transferua në vitin 2024 nga Marseille për 15 milionë paund dhe ka ende tre vjet kontratë në “Selhurst Park”. Sipas raportimeve, Palace do të kërkojë të paktën trefishin e shumës që pagoi për të, ndoshta edhe më shumë duke marrë parasysh tregun aktual.

United e sheh Sarrin si konkurrencë të fortë për lojtarë si Benjamin Sesko, Matheus Cunha dhe Bryan Mbeumo, ndërsa klubi po kërkon të ndërtojë një skuadër më të thellë për sezonin e ngarkuar që e pret.

Për sulmuesin senegalez interesim ka edhe nga Juventusi, ndërsa ai numëron 23 gola në 87 paraqitje me kombëtaren e Senegalit. /GazetaExpress/