Përfiton Kosova më shumë nëse nuk e jep Hashimin për viza, apo përfiton më shumë nëse nuk e jep Veriun për Luginën?
Shkruan Lis Bukuroca
I gëzohesh më shumë dështimit të Albinit,
apo i trishtohesh më shumë
fitores së Isa Mustafës?
Është më mirë të martohesh me një burrë (grua)
shumë të shëmtuar,
por shumë të mençur,
apo me një burrë (grua) shumë të bukur,
por shumë të trashë nga mendja?
*
Ishte më e lehtë për të ikur
nga diktatura,
apo ishte më e rëndë
të duartrokitej ajo?
*
Është më fisnike të jesh veteran i penduar
pse ke marrë pjesë në luftë,
apo veteran i penduar
pse nuk ke marrë pjesë në luftë?
*
Të pëlqen më shumë të udhëhiqesh nga një tradhtar
i padëshmuar,
apo të pëlqen më shumë të udhëhiqesh nga një hajn
i dëshmuar?
*
Do të parapëlqeje të shoqërohesh në ferr n
ga zoti,
apo do të parapëlqeje shoqërimin në parajsë
nga djalli?
*
A është ndjesi më e keqe të tradhtosh
gruan (burrin)
apo është ndjesi më e mirë të tradhtohesh
prej saj (tij)?
*
Është më e madhe dëshira për të ikur
nga një burrë i dhunshëm,
apo është tuta më e madhe
për të qëndruar me të?
*
Është kompliment më i madh të thuhet
se je i dijshëm si Ramushi,
apo komplimenti është më i madh kur të thuhet
je injorant si Albini?
*
Është nder më i madh nëse të thuhet se je karrierist dhe makiavelist
i mirë si Isa Mustafa,
apo kur të thuhet se je karrierist makiavelist
i lig si Hashim Thaçi?
*
A është më keqdashës shkatërrimi i zemrës
nga Sali Berisha,
apo më i mirëseardhur është shkatërrimi i shpirtit
nga Edi Rama?
*
Më mirë do të arratiseshe nga varfëria që të shkakton pushtuesi,
apo është më trishtuese të mbetesh duke vështruar
se si shteti jot shkatërron të tashmen tënde
dhe ardhmërinë e fëmijëve tu?
*
Cilën jetë do të zgjidhje?
Nja 80 vjet parajsë këtu
dhe ferrin pas vdekjes,
apo nja 80 vjet xhenem këtu
dhe pas vdekjes parajsë?
*
Më shumë do të mburreshe nëse burgosesh
për 20 vjet nga Serbia,
apo do të përjetoje më shumë kënaqësi
pse ke duruar 20 vjet vjedhjen e atdheut?
*
Më e gjatë të duket rruga derisa të arrish në takimin e parë
me një grua (burrë),
apo më e gjatë të duket rruga te gjykata për shkurorëzim
nga gruaja (burri) e parë,
edhe pse largësia është e barabartë?
*
Kur kthehet burri në shtëpi qe gëzuar më shumë
kur doli jashtë,
apo dëshpërohesh më shumë
pse nuk qëndroi më shumë ?
*
Është më e moralshme një dashuri shumë e madhe
njëjavore,
apo është më e pamoralshme bashkëjetesa
e përjetshme
pa dashuri?
*
Përfiton Kosova më shumë
nëse nuk e jep Hashimin për viza,
apo përfiton më shumë
nëse nuk e jep Veriun për Luginën?
*
Në demokraci normale,
nuk është normale ish-kryeministri
të bëhet kryetar i vendit normal.
Në demokracitë tribale,
nuk është normale,
ish-kryeministri të mos bëhet kryetar normal
i vendit jonormal!
*
Është më e moralshme të quhesh Morales
(ish-kryetar i Bolivisë që kërkoi azil në Argjentinë )
dhe të akuzohesh për financim të terrorizmit,
apo është më e pamoralshme të jesh besimtar i devotshëm
duke predikuar urrejtjen
dhe terrorizmin?
*
Ke frikë më shumë nëse të merr në pyetje
zoti personalisht,
apo ke më pak frikë nëse të merr në pyetje
djalli personalisht?
*