Trump: Marrëveshja me Iranin s’është përfundimtare, nëse nuk sillen si duhet, do t’ua hedhim bombat në kokë

Lajme

Gazeta Express

17/06/2026 14:33

Presidenti Donald Trump tha sot se marrëveshja SHBA-Iran për t’i dhënë fund luftës nuk është një marrëveshje përfundimtare, duke shtuar se Shtetet e Bashkuara do t’i rifillojnë sulmet nëse Irani nuk “sillet si duhet”, raporton CNN.

I pyetur nga një gazetar gjatë një takimi me Presidentin egjiptian Abdel Fattah el-Sisi nëse marrëveshja është përfundimtare, Trump tha: “Jo, nuk është përfundimtare. Është një memorandum mirëkuptimi”.

“Nëse nuk më pëlqen, nëse ata nuk sillen si duhet, ne do të kthehemi menjëherë duke hedhur bomba drejt e në mes të kokës së tyre”, shtoi Trump, duke iu referuar Iranit.

CNN ka siguruar një kopje të draftit të marrëveshjes, e cila përcakton kushtet e armëpushimit, rihapjen e Ngushticës së Hormuzit, një pjesë të lehtësimit financiar për Iranin dhe një ritheksim nga Teherani se ai nuk do të prodhojë kurrë një armë bërthamore.