Trippier po e shqyrton mundësinë e prishjes së marrëveshjes me Wolvesin, disa ditë pas nënshkrimit

Futboll

Gazeta Express

12/06/2026 19:00

Në një seri ngjarjesh të pazakonta, raportohet se Kieran Trippier po shqyrton mundësinë të tërhiqet nga marrëveshja e tij me klubin e Championshipit, Wolverhamptonin, vetëm disa ditë pasi u konfirmua transferimi i tij me kontratë dyvjeçare.

Trippier, i cili u largua nga Newcastle United këtë verë pas përfundimit të kontratës, ishte përshkruar nga trajneri Rob Edwards si një “blerje e madhe”, duke marrë parasysh rënien e fundit të klubit në Championship.

Edwards kishte thënë: “Jam shumë i lumtur që e kam sjellë këtu, sepse kur u takuam ishte e qartë që ai vërtet dëshiron të vijë te Wolves. Ai dëshiron të na ndihmojë të ngjitemi përsëri në Premierligë.”

Trippier gjithashtu kishte shprehur entuziazmin e tij për transferimin, duke thënë se ishte “shumë i lumtur që është këtu” mes interesimit nga klube të Premierligës.

Megjithatë, vetëm disa ditë më vonë, trajneri Rob Edwards u shkarkua nga Wolverhamptoni pas vetëm shtatë muajsh në detyrë, një vendim që raportohet se e ka zemëruar Trippierin.

Sipas gazetarit Pete O’Rourke, mbrojtësi ndihet “i mashtruar” nga klubi dhe po mendon seriozisht të anulojë marrëveshjen.

Raportohet gjithashtu se kontrata e Trippierit me Wolves do të hynte në fuqi më 1 korrik.

Edwards, i cili kishte marrë drejtimin në nëntor pas largimit të Vítor Pereira, u befasua nga shkarkimi dhe thuhet se është i pakënaqur me mënyrën si iu komunikua vendimi.

Klubi pritet ta zëvendësojë atë me César Peixoto nga skuadra Gil Vicente.

Në një deklaratë zyrtare, drejtuesi ekzekutiv i Wolves, Nathan Shi, tha se vendimi ishte i vështirë dhe erdhi pas një rishikimi të plotë të operacioneve të klubit.

Ai theksoi se vendimi nuk kishte të bënte me karakterin apo profesionalizmin e Edwards, por me nevojën për një drejtim të ri sportiv që do t’i jepte klubit më shumë konkurrueshmëri dhe një identitet më të qartë në të ardhmen./GazetaExpress/