“Tradhti ndaj Realit”, Arbeloa flet pas përleshjes mes Tchouamenit e Valverdes

Futboll

Gazeta Express

09/05/2026 12:55

Trajneri i Real Madridit, Alvaro Arbeloa, ka shpërthyer ndaj rrjedhjes së informacionit për një përplasje në dhomën e zhveshjes mes Aurélien Tchouaménit dhe Federico Valverdes.

Ai mbrojti të dy lojtarët pasi ata kërkuan falje për incidentin në stërvitje dhe këmbënguli se skuadra mbetet e bashkuar.

Raportimet zbuluan një përplasje të ashpër gjatë stërvitjes mes Valverdes dhe Tchouamenit, e cila thuhet se i la Valverdes një çarje në fytyrë dhe solli masa disiplinore nga klubi.

Arbeloa e trajtoi çështjen në një konferencë për shtyp, duke e vlerësuar reagimin e shpejtë të klubit, por duke shprehur zemërim për rrjedhjen e detajeve në media.

Ai e konsideroi këtë shkelje si serioze dhe në kundërshtim me vlerat e klubit, duke insistuar se çështjet e brendshme duhet të mbeten brenda dhomës së zhveshjes.

Arbeloa kritikoi ashpër ata që lejuan informacionin të dilte në publik.

“I pari jam shumë krenar për vendosmërinë, shpejtësinë dhe transparencën me të cilën ka vepruar klubi,” tha ai, sipas “Marca”.

“Nga ana tjetër, lojtarët e kanë pranuar gabimin, kanë shprehur keqardhje dhe kanë kërkuar falje. Për mua kjo është e mjaftueshme. Ajo që nuk do të bëj është t’i ‘djeg’ publikisht, sepse nuk e meritojnë”, shtoi ai.

Ai shtoi gjithashtu se merr përgjegjësi për formën e skuadrës këtë sezon dhe se zhgënjimi mund të çojë në situata të tilla.

“Unë jam i pari përgjegjës që ndoshta nuk kemi qenë në nivelin e duhur këtë sezon. Është e qartë se frustrimi mund të të çojë në situata që nuk i dëshiron. Tani duhet të fokusohemi te ndeshja. Nëse doni të fajësoni dikë, ja ku jam unë”, tha spanjolli.

Duke folur për rrjedhjen e informacionit, ai ishte edhe më i ashpër.

“Për mua, që gjërat që ndodhin në dhomën e zhveshjes të dalin në media është tradhti ndaj këtij klubi”, tha Arbeloa.

Arbeloa e vendosi incidentin në kontekst, duke thënë se në futbollin elitar tensionet e tilla ndodhin herë pas here, dhe kujtoi një episod nga karriera e tij si lojtar ku një sherr kishte shkuar edhe më larg fizikisht.

“Janë situata që kanë ndodhur gjithmonë, por nuk po i justifikoj. Ka qenë një incident dhe kemi pasur fat të keq që Fede u lëndua. Ata kanë kërkuar falje dhe tani duhet të mendojmë për ndeshjen,” përfundoi ai./GazetaExpress/