Tifozët e Ekuadorit i pushtojnë shkallët ikonike të Rocky Balboas në SHBA

Sport

Gazeta Express

14/06/2026 8:53

Atmosfera e Kupës së Botës 2026 po ndihet gjithnjë e më shumë në Philadelphia, ku qindra tifozë të Ekuadorit u mblodhën në shkallët ikonike të “Rocky Steps”, një nga simbolet më të njohura të qytetit amerikan, për ta festuar para debutimit të kombëtares së tyre në turne.

Të veshur me ngjyrat verdhë, blu dhe të kuqe të flamurit ekuadorian, tifozët e krijuan një atmosferë festive me këngë, valle dhe flamuj gjigantë, duke e tërhequr vëmendjen e turistëve dhe mediave lokale.

Pamjet nga grumbullimi u shpërndanë gjerësisht në rrjetet sociale, duke e treguar entuziazmin e madh të mbështetësve të “La Tri”.

Për komunitetin ekuadorian në Filadelfia dhe zonat përreth, fakti që kombëtarja e tyre po luan në qytet konsiderohet një moment historik.

Shumë tifozë kanë udhëtuar prej vitesh nëpër botë për ta ndjekur ekipin kombëtar, ndërsa këtë herë Botërori ka ardhur pranë tyre.

Ekuadori e nis sot aventurën e tij në Grupin E me ndeshjen ndaj Bregut të Fildishtë në Filadelfia, ndërsa pritshmëritë janë të mëdha pas paraqitjeve pozitive në kualifikime dhe formës së mirë që skuadra ka treguar në vitet e fundit.

Prania masive e tifozëve në shkallët e famshme të Rocky Balboas ishte një tjetër dëshmi se Kupa e Botës nuk luhet vetëm në stadiume, por edhe në rrugët e qyteteve pritëse, ku pasioni i futbollit bashkon mijëra njerëz nga e gjithë bota. /Gazeta Express