Studimi: Burrat mund të “trajonohen” për të ndihmuar më shumë në shtëpi

Fun

Gazeta Express

07/07/2026 17:46

Nëse jeni lodhur duke ia kujtuar partnerit vazhdimisht që të marrë më shumë përgjegjësi në shtëpi, një studim i ri sugjeron se zgjidhja mund të jetë më e thjeshtë nga sa mendohet.

Studiuesit kanë zbuluar se edhe një trajnim i vetëm dyorësh mund t’i shtyjë burrat të kalojnë dukshëm më shumë kohë duke u kujdesur për fëmijët.

Si pjesë e studimit, një grup burrash u udhëzuan se si të marrin një rol më aktiv në shtëpi. Trajnimi përfshinte mesazhe të qarta, ndër të tjera edhe faktin se shumë baballarë shpesh e mbivlerësojnë kontributin e tyre në kujdesin për fëmijët dhe punët e shtëpisë.

Analiza tregoi se pas këtij ndërhyrjeje, burrat kaluan mesatarisht një orë më shumë në ditë me kujdesin për fëmijët gjatë fundjavave. Kjo u dha bashkëshorteve të tyre më shumë kohë për angazhime të tjera.

Gjetjet sugjerojnë se, në vend që të konsiderohen “të pashpresë” kur bëhet fjalë për punët e shtëpisë, disa burra thjesht mund të kenë nevojë për një lloj orientimi apo trajnimi për të ndryshuar zakonet e tyre.

“Trajnimi rriti kohën që baballarët kalonin me fëmijët gjatë fundjavës, veçanërisht te ata që kishin fëmijë të vegjël”, tha profesori Shintaro Yamaguchi nga Universiteti i Tokios.

“Sidoqoftë, pjesa më e madhe e përfshirjes së re të baballarëve ndodhi kur të dy prindërit ishin së bashku me fëmijët. Ajo që realisht u liroi më shumë kohë nënave ishte ulja me rreth 2.6 orë e punëve të shtëpisë që ato kryenin”, shtoi ai.

Për studimin, studiuesit përfshinë më shumë se 1,200 punonjës meshkuj nga katër organizata japoneze.

Burrat u ndanë në dy grupe. Njëri grup mori pjesë në një trajnim dyorësh për balancën mes punës dhe jetës private, të udhëhequr nga baballarë që punojnë. Grupi tjetër u përfshi në një fushatë informuese që synonte të korrigjonte keqkuptimet rreth qëndrimeve të kolegëve ndaj pushimit të atësisë.

Studiuesit i anketuan pjesëmarrësit para ndërhyrjeve dhe sërish gjatë muajve në vijim, duke ndjekur ndryshimet në qëndrime, kujdesin për fëmijët, punët e shtëpisë dhe orët e punës.

Rezultatet treguan se trajnimi ishte shumë më efektiv sesa thjesht dhënia e informacionit, pasi solli ndryshime të matshme në sjellje.

Baballarët që përfunduan trajnimin kaluan rreth një orë më shumë në ditë duke u kujdesur për fëmijët gjatë fundjavave. Rritja më e madhe u pa te burrat që kishin fëmijë të moshës pesë vjeç ose më të vegjël.

Kjo u mundësoi bashkëshorteve të tyre të rrisnin orët e punës së paguar mesatarisht me 3.6 orë në javë.

Po ashtu, gratë shpenzuan rreth 2.6 orë më pak në punët e shtëpisë, sipas studimit të publikuar nga “Center for Research and Education in Program Evaluation”.

“Trajnimi nxiti një rinegocim të ndarjes së përgjithshme të punëve në shtëpi, jo vetëm një transferim të kujdesit për fëmijët”, tha profesori Yamaguchi.

Një studim i mëparshëm kishte zbuluar se një nga “afrodiziakët” më efektivë për gratë mund të jetë pamja e partnerit duke nxjerrë mbeturinat.

Studiuesit kanë gjetur një lidhje të fortë mes ndarjes së punëve të shtëpisë dhe dëshirës seksuale te gratë.

Sipas tyre, gratë raportojnë dëshirë më të lartë seksuale kur punët e shtëpisë ndahen në mënyrë më të barabartë.

Por kur ato mbajnë pjesën më të madhe të barrës, përfshirë larjen e enëve, rregullimin e shtretërve, nxjerrjen e mbeturinave dhe larjen e rrobave, raportojnë nivele më të ulëta pasioni dhe afërsie në marrëdhënie.

Në fund, studimi sugjeron se përfshirja më e madhe e burrave në shtëpi nuk ndihmon vetëm në ndarjen më të drejtë të përgjegjësive, por mund të ndikojë edhe në mirëqenien e përgjithshme të çiftit dhe familjes. /GazetaExpress/