Sindikata e mjekëve po diskuton se a do ta vazhdojë grevën

Gazeta Express

16/12/2019 11:51

Këshilli Drejtues i Sindikatës së Bashkuar të Mjekëve në këto momente është duke mbajtur mbledhje ku po diskutohet rreth asaj se a do t’i bashkohen mjekët kosovarë grevës për ta kundështuar pezullimin e Ligjit të Pagave.

Vendimi pritet të merret pas orës 12:00.

Se Këshilli Drejtues është mbledhur për të diskutuar rreth mundësisë për grevë e ka konfirmuar për Express, kreur i Sindikatës së Mjekëve, Blerim Syla.

“Jemi në këshill. Po diskutojmë rreth çështjes për grevën”, ka thënë Syla.

E ndërkohë, të premten që e lamë pas, që nga ora 07:00 e deri në orën 15:00 institucionet shëndetësore mbajtën grevë pas pezullimit të Ligjit për Paga deri më 30  mars 2020, nga Gjykata Kushtetuese.

Grevën e kundërshtoi Kolegjiumi Profesional i Kirurgëve duke e quajtur të pakuptimtë këtë grevë.

Ndërkohë është paralajmëruar se të hënën do të mbahet takimi i të gjithë mjekëve për të vendosur për hapat që do të ndërmerren në ditët në vijim.

Ndërsa Kirurgët e Qendrës Klinike Universitare të Kosovës nuk i janë bashkuar grevës së organizuar nga Federata e Sindikatave të Shëndetësisë.

Këtë e ka bërë të ditur kirurgu Arbër Morina, i njohur si një nga organizatorët e grevave të mëhershme të kirurgëve.

“Kolegjiumi profesional i kirurgëve sot merr vendim të njëzëshëm: nuk ka asnjë lloj greve, puna vazhdohet normalisht”, thuhet në njoftimin e Morinës. /Express/