Shqiptarët në Britani bëhen bashkë për punë, karrierë dhe biznes

Shqiperi

Gazeta Express

31/07/2026 18:35

Mundësi konkrete punësimi, zhvillimi profesional dhe bashkëpunimi në biznes po krijohen për komunitetin shqiptar në Mbretërinë e Bashkuar përmes një nisme të veçantë. Për herë të parë do të zhvillohet Samiti Shqiptar i Punësimit, Karrierës dhe Biznesit (Albanian Career & Business Summit UK 2026) në Londër.

Samiti do të mbledhë në një platformë të përbashkët kompani, punëdhënës, sipërmarrës, organizata, institucione trajnimi, studentë, profesionistë dhe punëkërkues shqiptarë, me synimin për të krijuar ura të reja bashkëpunimi dhe për të lehtësuar aksesin në tregun britanik të punës.

Gjatë aktivitetit, pjesëmarrësit do të kenë mundësi të takohen drejtpërdrejt me kompani që kanë vende të lira pune, të informohen mbi mundësitë e punësimit në sektorë të ndryshëm, të aplikojnë për kurse dhe trajnime profesionale, si edhe të krijojnë kontakte të vlefshme me punëdhënës dhe partnerë të mundshëm.

Organizatorët theksojnë se ky samit synon të shërbejë si një pikë takimi për shqiptarët që jetojnë dhe punojnë në Britani, duke promovuar zhvillimin profesional, integrimin në tregun e punës dhe forcimin e rrjetit të biznesit shqiptar.

Përveç punësimit, eventi do të promovojë edhe sipërmarrjen, inovacionin dhe bashkëpunimin mes bizneseve shqiptare dhe britanike, duke krijuar një mjedis ku profesionistët mund të ndajnë eksperienca, të ndërtojnë partneritete dhe të eksplorojnë mundësi të reja zhvillimi.

Albanian Career & Business Summit UK 2026 pritet të shndërrohet në një aktivitet të përvitshëm me ndikim për komunitetin shqiptar në Mbretërinë e Bashkuar, duke kontribuar në rritjen e mundësive profesionale dhe ekonomike për shqiptarët që jetojnë jashtë vendit.