“Salahu më ka para borxh”, Micah Richards flet për ish-bashkëlojtarin e tij

Futboll

Gazeta Express

03/07/2026 19:40

Micah Richards ka bërë shaka duke thënë se legjenda e Liverpoolit, Mohamed Salah, i detyrohet para, pasi një nder që i bëri një herë u kthye në një rutinë të përditshme 11 vite më parë.

Richards kaloi pjesën më të madhe të karrierës së tij te Manchester City, ku u formua si futbollist dhe zhvilloi 245 ndeshje, duke fituar edhe titullin historik të Premierligës.

Përpara se të bëhej një nga analistët më të njohur në “BBC”, “Sky Sports” dhe “CBS”, Richards e mbylli karrierën si futbollist tek Aston Villa.

Por para kësaj, ai pati një periudhë të shkurtër huazimi në Serie A te Fiorentina, ku u bë shok skuadre me Mohamed Salahun.

Edhe Salahu ishte i huazuar te klubi nga Firence nga Chelsea, duke shënuar nëntë gola në 26 ndeshje gjatë asaj periudhe.

Ky bashkëpunim i papritur ndodhi përpara se Salahu të shndërrohej në një nga futbollistët më të mirë në botë te Liverpooli, ku ka realizuar 257 gola dhe ka fituar çdo trofe të mundshëm.

Richards tha se i pëlqeu shumë të ishte shok skuadre me Salah gjatë sezonit 2014/15, por pasi përfundoi pa dashje si “shoferi” i tij, ai beson se “Mbreti Egjiptian” i detyrohet disa para për karburantin.

Duke folur për “SPORTbible”, Richards tha: “Ai (Salah) ishte më i miri. Në stërvitje ishte i jashtëzakonshëm. Në thelb u bëra shoferi i tij, sepse ai nuk ngiste makinë kur ishte në Firence. Një herë e çova në stërvitje dhe ai më tha: ‘Shihemi nesër në orën 9:00’. I thashë: ‘Çfarë do të thuash? E di që mund të marrësh një taksi, apo jo?’. Qendra stërvitore ishte vetëm 10 minuta larg. Që nga ajo ditë e mora çdo mëngjes me makinë. Më detyrohet ca para! Ajo periudhë ishte fantastike. Unë isha i huazuar nga Manchester City dhe isha drejt fundit të aventurës sime atje, ndërsa ai vinte nga Chelsea, ku gjërat nuk i kishin shkuar mirë. Thjesht po e shijonim futbollin pa presionin shtesë. Dhe ajo anë e Mo ishte e mrekullueshme”.

Salahu ndihmoi Egjiptin të arrinte për herë të parë në histori në fazën me eliminim direkt të Kupës së Botës, duke e mbyllur Grupin G në vendin e dytë me pesë pikë nga tri ndeshje.

Ai shënoi në fitoren 3-1 ndaj Zelandës së Re, por u zëvendësua në pjesën e dytë të barazimit 1-1 me Iranin pasi pësoi një dëmtim në muskulin e pasëm të kofshës.

Megjithatë, Salah është rikthyer në stërvitje në kohën e duhur dhe është në garë për të luajtur të paktën një pjesë të ndeshjes së 1/16 së finales kundër Australisë, që zhvillohet të premten në Arlington të Teksasit.

Trajneri i Egjiptit, Hossam Hassan, dha një përditësim pozitiv për gjendjen e Salahut, duke deklaruar për “beIN Sports”: “Do t’ju them se Salah është pjesë e ekipit. Edhe ne u befasuam. Gjëja më e rëndësishme është se Salah ka kaluar një trajtim intensiv me pajisje mjekësore. Njerëzit që punuan sot dhanë maksimumin e tyre dhe Salah tregoi dëshirë të madhe për t’u rikuperuar. Ai mori pjesë dje në seancën e parë stërvitore me ekipin që nga ndeshja me Iranin. Sot u bashkua edhe në stërvitjen tonë të fundit dhe po ecën shumë mirë. Shpresoj që të jetë gati dhe të nisë betejën e tij.”/GazetaExpress/