Rugova menaxhoi pafuqinë tonë

OP/ED

Gazeta Express

22/03/2024 16:34

Sërish dalin në skenë mohuesit e historisë, të cilët tentojnë të rrënojnë edhe atë pak dinjitet e kulturë shtetërore që ka mbetur në këtë vend

Pal Shtufi

Në Psessing/T7, Xhavit Haliti gënjen publikisht sikur më 1998 LDK paska punuar kundër UÇK-së. Gënjen dhe syri nuk i trembët, sepse në dhjamin e gënjeshtrës ka jetuar dhe vazhdon të jetojë ky hero i epopeve.

Dhe, shih ti, pas Xhavitit doli Baton Haxhiu dhe “verifikoi” historinë e trilluar nga Xhaviti, duke dhënë emrat e atyre që paskan kërkuar nga president Klinton që ky “mos ta njihte UÇK-në”.

Dikur moti e kuptoja Batonin pse notonte moçaleve të Xhavitit&CO. Ishin kohëra emocionesh dhe mendja bënte gjumin e vet nga zhurma e euforive të kohës. Mirëpo tani, kur koha ka dëshmuar për secilin kush ishte dhe çfarë kishte bërë nga vitet 1989-1999, pse Batoni tund “argumentet” e njeriut i cili gënjeshtrën e ka argument, luftë, çlirim dhe pasçlirim? Këtë, vërtet nuk e kuptoj. Nuk e kuptoj, sepse Batoni megjithatë ka një bazë qytetare dhe intelektuale – jo si këta bosat, të cilët as librat e Enver Hoxhës nuk i kanë lexuar, pale ndonjë tjetër. 

Dy dëshmi

1. Dy, prej pesë “tradhtarëve” që paskan kërkuar mosnjohjen e UCK-së në Uashington, ende janë të gjallë, të cilët nuk ishin miq politik të Ibrahim Rugovës: Veton Surroi dhe Bujar Bukoshi. As prej dëshmisë së këtyre dy dëshmitarëve nuk tremben trilluesit!

• Dëshmia e dytë është dokumenti i deklasifikuar amerikan, të cilin vet e sollën si “fakt”, e që në fakt, po ky dokument tregon sasinë dhe cilësinë e gënjeshtrave të Xhavitit. Ja ç’thotë dokumenti:

“Rugova e përshkroi situatën në terren si ‘shumë të rrezikshme dhe tha se disa ‘veprime parandaluese’ janë kritike. Ai luti SHBA-të që ‘të marrin rol udhëheqës në Kosovë, ta marrin Kosovën’, në mënyrë që të parandalojnë katastrofën. Në lidhje me Ushtrinë Çlirimtare të Kosovës tha se ka shumë grupe të frustruarish në Kosovë që aksionet e tyre po përdoren si pretekst nga Millosheviç-i për të kryer masakra. ‘Jemi të vegjël dhe s’mund të ofrojmë më shumë politika’, vazhdoi. ‘Ju lutemi që të na mbështesni për pavarësi. Ky është vullneti im dhe vullneti i popullit’”

Pra, sipas Xhavit Halitit, të flisje sinqerisht me Presidentin Klinton dhe t’i tregoje se njerëzit e dalë në mal janë të frustruar, si i gjithë kombi shqiptar, na qenka thirrje për mosnjohje të UÇK-së.  Këtu, sinqerisht, as neuropsikiatri nuk ndihmon në këtë përkthim makabër.

Pse gjithë këto gënjeshtra?

E njoh këtë soj të LPK-së. Ndoshta i njoh më mirë se ata veten e tyre. Nuk munden suksesin e përbashkët kombëtar e ndërkombëtar ta shohin si të përbashkët. Nuk munden pa gënjeshtra. Duke prodhuar politika të pa mençura, prej 1980 e deri sot, ky soj ka nevojë të ngritët përmes mohimit të vlerave të tjerëve, në këtë rast duke gënjyer për Rugovën dhe intelektualët që e pasonin. Vetëm duke sharë, gënjyer e denigruar, këta mund të mbesin në skenë, ndryshe, për dy-tre vjet i ha ndryshku i kohës. Ky soj, shkaku i hijeve të mëdha, kërkojnë prerjen e lisave!

Për Veton Surroin

Që kur kam dhënë dorëheqje nga Kryesia e Partisë Parlamentare (1992), me Vetonin rrallë jam pajtuar politikisht. Kjo mund të konsiderohet edhe si çështje shijesh, karakteresh dhe bindjesh individuale. Mirëpo, një gjë duhet ta dinë ata që e sulmojnë nën brez, Vetoni asnjëherë nuk ka qenë në pozicione politike, të cilat kanë mundur të shihen si pozicione kundër interesave të këtij vendi. Siç thash, me Vetonin mund të dallonim për udhët dhe metodat e arritjes së qëllimit sublim kombëtar, por jo në qëllimin si të tillë. Me këtë shpjegim dua të them se nuk kam asnjë motiv për t’i dhënë krah Vetonit. Motiv e kam të vërtetën, të cilën Lëpëkëistët duan ta deformojnë me çdo kusht dhe mjet.

Rugova

Rugova, bashkë me plejadën e intelektualëve shqiptarë, ishin forca e mendjes dhe urtisë, të cilët arritën të menagjonin pafuqinë totale të një kombi të frustruar e të rënë përtokë. Me dashuri, kujdes e përgjegjësi të paparë në historinë tonë, kjo plejadë, në krye me Ibrahim Rugovën, pafuqinë e kthyen në qëndrueshmëri dhe urti, duke bërë Amerikën mike, e cila bashkë me aleatët, çliruan çdo pëllëmbë të kësaj toke. Çdo pëllëmbë, pos Rognerit në Tiranë.

Prandaj, sot nuk ka nevojë të mbrohet Rugova e as ajo pjesë e historisë. Sot duhet të mbrohen të rinjtë nga gënjeshtrat e burrave, të cilët luftën e shfrytëzuan për sajim historish të paqena dhe pasurim marramendës.