Trajneri i Barcelonës ka propozuar që të gjitha ndeshjet e ekipeve kombëtare të luhen në një pushim të vetëm ndërkombëtar.
Ndeshjet e Kombëtareve në shtator nuk dolën të jenë të mira në veçanti për Barçën, pasi disa futbollistë kryesorë të kësaj skuadre u lënduan – transmeton Gazeta Express.
Araujo, Kounde, De Jong e Depay, janë futbollistët në listën e mungesave te Barcelona, pasi ata u lënduan në ndeshjet me ekipet e tyre kombëtare respektive.
I përballur me probleme të tilla, Xavi ka thënë se do të ishte mirë të gjendej një formulë që ndihmon në shmangien e kaq shumë lëndimeve dhe aq shumë lodhjeve.
“Është e komplikuar. FIFA ka një plan për të mbajtur Botërorin çdo dy vjet, kjo është e diskutueshme”, tha fillimisht trajneri spanjoll.
“Por, ka edhe një version të kalendarit, në të cilin ekipet kombëtare mblidhen dhe luajnë për një muaj e gjysmë. Pas kësaj, klubet marrin lojtarët për pjesën tjetër të sezonit. Do të ishte një bllok me ndeshjet e kombëtares”, shtoi Xavi.
“Mendoj se do të ishte një zgjidhje e mirë, por nuk varet nga unë”, deklaroi trajneri i Barcelonës. /Gazeta Express/