Policia jep detaje për rrahjen masive mes gjimnazistëve

Gazeta Express

06/12/2019 9:15

Policia në Gjakovë ka konfirmuar rastin e përleshjes fizike të gjimnazistëve të kësaj komune.

Sipas policisë, kjo rrahje ka ndodhur për shkak të mosmarrëveshjeve paraprake mes dy grupeve të të rinjve.

“Më datë 05.12.2019 në ora 12:45, në stacionin policor Gjakovë është raportuar një mosmarrëveshje e ndodhur në mes të disa personave në rrugën “UÇK”. Dy personat ankues kanë deklaruar se derisa kanë qenë duke shkuar në shkollë kanë takuar katër persona të dyshuar po ashtu nxënës të shkollës së mesme me të cilët të njëjtën ditë në ora 09:30 kishin pasur një mosmarrëveshje”, ka thënë për Gazetën Sinjali zëdhënësja e Policisë Lirie Podrimaj.

Sipas saj, bazuar në deklaratat e të dëmtuarve, personat e dyshuar i kanë  sulmuar fizikisht me grushte dhe shqelma me ç’rast dy prej tyre kanë pësuar lëndime të lehta trupore dhe janë dërguar për trajtim mjekësor.

Policia njofton se të dyshuarit janë intervistuar në prani të prindërve dhe avokatëve mbrojtës dhe më pas janë ndaluar në dhomat e mbajtjes me urdhër të Prokurorit të Shtetit. Rasti nën hetime.