Pensionohet ish-ylli i Barcelonës: U solla si budalla në Barçë

Gazeta Express

24/03/2020 21:23

Alexandr Hleb, ish-futbollisti i Barcelonës, ka vendosur t’i varë këpucët në gozhdë në moshën 38-vjeçare, duke i dhënë fund një karriere 22-vjeçare. Ai e kujton kohën dhe dështimin për të shndritur në një ekip të udhëhequr nga Pep Guardiola.

Hleb ishte yll shndritësh në skuadrën e Stuttgart, e udhëhequr nga Felix Magath dhe në Arsenalin e Arsene Wenger, por dështoi ta përsërisë të njëjtën në Barcelonë, raporton Gazeta Express.

“Kam pasur një karrierë të madhe. I bëra dy gabime, por kam kujtime të mira nga të gjitha klubet për të cilat kam luajtur”, tha Hleb.

“Tani jam i lodhur. Trupi im nuk e merr veten siç bënte dikur, por unë e dua futbollin. Sapo ta shoh një ndeshje në televizion, menjëherë e ndiej mungesën e futbollit”, shtoi Hleb.

Pasi shkëlqeu në Arsenal për tri sezone, Barcelona vendosi ta blejë bjellorusin për 17 milionë euro në vitin 2008.

Guardiola e mori drejtimin e skuadrës atë verë dhe u duk se Hleb do ta formonte një treshe të frikshme me Lionel Messin dhe Thierry Henry, por nuk qe e shkruar.

“Ishte plotësisht faji im (për dështimin në Barcelonë) dhe jo i Guardiolës”, theksoi Hleb.

“Ai bëri gjithçka për të më ndihmuar të mësohem shpejt me jetën në Spanjë dhe me grupin, si dhe ta mësoj gjuhën. Unë u solla si budalla. Grupi ishte shumë i mirë. Pendohem që nuk mësova të flas spanjisht”, zbuloi ai. /Gazeta Express/