OJQ Qeveria e Kosovës

OP/ED

Gazeta Express

15/07/2022 16:43

Për shumë probleme që kërkojnë zgjidhje në Kosovë, qeveria vetëm konstaton, analizon e komenton, por nuk ofron alternativë. Të krijohet përshtypja se është organizatë qeveritare, e jo qeveri e zgjedhur me besimin e gjysmës së elektoratit.

Imer Mushkolaj

Spitalet në Kosovë po mbeten pa mjekë, por ky problem nuk duket që po i bën shumë përshtypje as ministrit të Shëndetësisë, as qeverisë, as kryeministrit. Përveç konstatimit të gjendjes, asnjë masë a veprim nuk është ndërmarrë që ky problem të adresohet. Njësoj po ndodh edhe në fusha të tjera.

Gjendja në arsim vazhdon të jetë e vështirë, por ministria përgjegjëse, të paktën deri tash, nuk është se ka ndërmarrë veprime konkrete për të ndryshuar diçka radikalisht.

Infrastruktura rrugore vazhdon të jetë në të njëjtën gjendje, por dikasteri përkatës nuk e ka shtruar asnjë metër asfalt për gati një vit e gjysmë.

Nëse dëgjojmë diskursin dhe arsyetimet e zyrtarëve qeveritarë dhe të deputetëve të shumicës në parlament, ata vetëm konstatojnë dhe shprehin shqetësimin se gjendja është keq, gjendja është e vështirë. Ngjashëm qysh veprojnë edhe organizatat joqeveritare që përcjellin punën e qeverisë dhe politikat publike në përgjithësi.

Por, qeveritë krijohen jo vetëm për të konstatuar problemet, por në radhë të parë për t’i zgjidhur ato. Është e çuditshme sesi, në një situatë mjaft të vështirë sociale dhe ekonomike, qeveria ecën me hapa shumë të ngadalshëm, madje shpesh nuk bën kurrfarë veprimesh për të ndihmuar. Zakonisht përgjegjësia i adresohet krizës globale dhe efekteve të saj, por pak flitet për përgjegjësinë qeveritare karshi kësaj krize.

* * *

Vetëvendosja në pushtet është krejt tjetër nga Vetëvendosja në opozitë. Kjo edhe mund të mos tingëllojë e çuditshme, por i çuditshëm është fakti i mungesës së ndjenjës së përgjegjësisë pr problemet e shumta, për të cilat është premtuar zgjidhje. Shqetësues është injorimi i sfidave, me të cilat duhet përballur.

Rrjetet sociale të zyrtarëve institucionalë janë një pasqyrë e mirë se çfarë po bën qeveria. Jo rrallë, katër-pesë ditë rresht në profilet zyrtare të kryeministrit nuk ka gjë tjetër përveç urimeve, përshëndetjeve dhe përkujtimeve për ditë të shënuara.

Mospuna arsyetohet me dëmin që e kanë shkaktuar ata që kanë qenë në pushtet në të kaluarën. Por, këto arsyetime nuk mund të vazhdojnë pa kufi. Njerëzit ia kanë dhënë më shumë se 50 për qind të votave Albin Kurtit dhe Vetëvendosjes për të punuar, e jo për të konstatuar, analizuar e komentuar problemet dhe sfidat.

E problemet janë të shumta. Sa ka qenë në opozitë, Vetëvendosja premtonte kujdes për punëtorët, të cilëve iu shkelen të drejtat. Premtonte shtim të numrit të inspektorëve, të cilët do të vendosnin rend e rregull. Por, për gati një vit e gjysmë në pushtet, nuk ka ndodhur asnjëra nga këto. Të paktën publikisht nuk është bërë e ditur asnjë rast serioz kur institucionet kanë ndërhyrë për t’i përmirësuar të drejtat e punëtorëve.

Sa ka qenë në opozitë, Vetëvendosja ishte kritike për thuajse të gjitha veprimet dhe vendimet e qeverive. Tash, kur e ka rastin që të punojë e të përmirësojë gabimet e të kaluarës, Vetëvendosja nuk vepron, por vetëm shikon, analizon, komenton dhe kritikon ata që kanë qenë në pushtet.

Ata që kanë qeverisur ndër vite janë ndëshkuar me votë më 14 shkurt të vitit të kaluar. Por, kaq nuk mjafton që qeveria të arsyetojë mospunën e vet. Përtej retorikës çfarë ka ndodhur në të kaluarën, njerëzit presin të shohin dhe të ndiejnë çfarë bën qeveria tash. Presin që, atë që është bërë keq në të kaluarën, ta bëjë mirë tash.

* * *

Në përpjekje për të arsyetuar mungesën e rezultateve në qeverisje, zyrtarët e Vetëvendosjes sikur kanë krijuar një paranojë se të gjithë janë kundër tyre, kundër qeverisë dhe kundër Albin Kurtit. Kështu, shumë nga ta e humbin arsyen e shëndoshë që të vlerësojnë drejt punën ose mospunën e ekzekutivit. Dhe, fajtorin e gjejnë te mediat, te gazetarët.

Për qeverinë, gjithçka është OK, por mediat janë ato që po e nxijnë realitetin. Po të mos ishin mediat dhe gazetarët, në këtë vend do të lulëzonte gjithçka.

Mediat nuk po bëjnë gjë tjetër, veç po e kryejnë punën e vet. Dhe qeveria, në vend se t’i “demantojë” ato me punë, zgjedh t’i sulmojë. Ashtu siç veproi në Kuvendin e Kosovës një deputete e pushtetit, e cila kërkoi të merren masa ndaj mediave.

Qeveria nuk bën të sillet më si një OJQ, por duhet t’i zbatojë përgjegjësitë që i ka. Duhet t’iu tregojë së pari atyre që e kanë votuar, e pastaj të gjithë qytetarëve

të Kosovës se është aty për të punuar, e jo për të vrojtuar. Është aty për të përligjur besimin e qytetarëve.

Çdo përpjekje për të arsyetuar mospunën është e kotë. Siç janë të kota edhe përpjekjet për të adresuar përgjegjësinë diku tjetër. Rezultatet po mungojnë, kur po kalon një e treta e mandatit qeverisës.