Ochoa vendos rekord në Botëror, por FIFA e lë pa një nderim të veçantë

Futboll

Gazeta Express

25/06/2026 12:39

Guillermo Ochoa shkroi një tjetër kapitull të historisë së futbollit meksikan në Kupën e Botës 2026, por ndryshe nga disa legjenda të tjera të turneut, ai nuk mori një vlerësim të veçantë nga FIFA për arritjen e tij.

Pas dy fitoreve të para në fazën e grupeve, Meksika kishte siguruar kualifikimin dhe trajneri vendosi të aktivizonte disa lojtarë rezervë në sfidën ndaj Çekisë. Vendasit fituan bindshëm 3-0, siguruan vendin e parë në Grupin A dhe një përballje më të favorshme në fazën e 1/32-ës.

Në pjesën e dytë, tifozët në stadiumin “Azteca” përjetuan një moment emocionues. Fillimisht u zëvendësua talenti 17-vjeçar Gilberto Mora, ndërsa pak çaste më vonë në fushë hyri legjenda Guillermo Ochoa, i cili u prit me ovacione të mëdha nga publiku.

Edhe pse nuk iu desh të bënte asnjë pritje gjatë minutave që luajti, pas vërshëllimës përfundimtare Ochoa u ngrit mbi supet e bashkëlojtarëve, në një festë emocionuese që mund të ketë qenë paraqitja e fundit e tij në një Kupë Bote.

Megjithatë, ndryshe nga Cristiano Ronaldo, Manuel Neuer dhe Yūto Nagatomo, të cilët mbajnë një emblemë speciale në fanellë për pjesëmarrjen në gjashtë Kupa Bote, portieri meksikan nuk mori një nderim të tillë, edhe pse ky është turneu i tij i gjashtë.

Ochoa ishte pjesë e Meksikës që në Botërorin e vitit 2006 në Gjermani si portier i tretë, pa debutuar në fushë. Që nga ajo kohë ai është shndërruar në një ikonë të kombëtares, duke regjistruar 151 paraqitje me fanellën e Meksikës.

Në moshën 40 vjeç e 347 ditë, Ochoa u bë futbollisti i gjashtë më i vjetër që ka luajtur ndonjëherë në një Kupë Bote. Vetëm Pat Jennings, Cristiano Ronaldo, Roger Milla, Faryd Mondragón dhe Essam El Hadary kanë luajtur në këtë turne në një moshë më të madhe.

Pas ndeshjes, portieri veteran nuk i mbajti dot lotët, duke përjetuar një moment të ngjashëm emocional me Neymarin, i cili gjithashtu u përlot vetëm pak orë më herët.

Megjithatë, aventura e Meksikës në Botëror nuk ka përfunduar ende. Edhe pse Raúl Rangel pritet të mbetet portieri titullar në fazën me eliminim direkt, Ochoa mund të ketë ende mundësinë të shtojë një tjetër paraqitje historike në karrierën e tij.

Nëse gjithçka shkon sipas parashikimeve, Meksika mund të përballet me Anglinë në fazën e 1/16-ës, ndërsa fituesi i këtij dueli do të ketë përballë Brazilin ose Norvegjinë në çerekfinale. /GazetaExpress/