Nottinghami merr fitore të madhe për mbijetesë, e ‘fundosë’ Chelsean

Futboll

Gazeta Express

04/05/2026 18:16

Një Nottingham Forest i ri në moshë mposhti Chelsean me rezultat 3-1 në Premierligë, duke thelluar krizën në “Stamford Bridge”, ku “Tricky Trees” tashmë janë të pamposhtur në katër vizita (2 fitore, 2 barazime).

Trajneri i përkohshëm i “Blues”, Calum McFarlane, kishte nisur me një fitore në gjysmëfinalen e FA Cup kundër Leeds Unitedit, por çdo efekt pozitiv u zhduk brenda dy minutave. Dilane Bakwa krosoi për Taiwo Awoniyin, i cili shënoi me kokë duke mposhtur Robert Sánchezin.

Enzo Fernándezi ishte pranë barazimit, por goditja e tij preku shtyllën.

Më pas situata u përkeqësua për vendasit kur Malo Gusto ndërhyri ndaj Awoniyit në zonë, duke detyruar VAR-in të japë penallti.

Igor Jesus shënoi nga pika e bardhë, duke lënë tifozët vendas të tronditur.

Në mbrojtje, Morato ishte figura më me përvojë në një repart ku debutoi Luca Netz dhe Zach Abbott bëri vetëm paraqitjen e tij të dytë në ligë.

Pikërisht një moment i mungesës së eksperiencës solli një përplasje të rëndë mes Abbottit dhe Jesse Derryt, që çoi në ndërprerje 10-minutëshe dhe largimin e këtij të fundit me barelë.

Cole Palmer nuk arriti të përfitonte nga penalltia, pasi Matz Selsi e priti goditjen.

Rikthimi i Levi Colwillit në pjesën e dytë ishte një lajm pozitiv për Chelsean, por banka e Forestit bëri diferencën.

Morgan Gibbs-White asistoi për golin e dytë të Awoniyit pas një kontrolli të VAR-it për pozicion jashtë loje.

Megjithatë, ndeshja vazhdoi me incidente, pasi një përplasje tjetër detyroi largimin nga fusha si të Gibbs-White ashtu edhe të portierit Sánchez.

João Pedro mendoi se shënoi për Chelsean, por goli iu anulua për pozicion jashtë loje.

Ai më në fund realizoi në kohën shtesë me një goditje spektakolare me roveshatë, por ishte tepër vonë për të ndryshuar rezultatin.

Chelsea tani ka humbur gjashtë ndeshje radhazi në kampionat – seria më e keqe që nga viti 1993 – dhe renditet në vendin e nëntë, me top pesëshen tashmë matematikisht jashtë arritjes.

Ndërkohë, Nottingham Foresti është gjashtë pikë mbi zonën e rënies me tri ndeshje të mbetura dhe praktikisht ka siguruar mbijetesën falë një serie prej shtatë ndeshjesh pa humbje.

Tani vëmendja e tyre do të zhvendoset te gjysmëfinalja e kthimit në Ligën e Evropës kundër Aston Villës, me Forestin që e kishte fituar ndeshjen e parë 1-0 në “City Ground”.

Chelsea momentalisht ka 48 pikë, në vendein e nëntë në tabelë, derisa Nottinghami është i 16-ti me 42 pikë, gjashtë më shumë se West Hami që është i 17-ti./GazetaExpress/