Mourinho nënshkruan kontratë trivjeçare si trajner i Realit

Futboll

Gazeta Express

29/05/2026 17:00

Jose Mourinho është pranë rikthimit te Real Madridi për herë të dytë, pasi javën e kaluar nënshkroi një kontratë deri në vitin 2029, sipas raportimeve të David Ornstein dhe Mario Cortegana nga “The Athletic”.

Real Madridi pritet ta prezantojë zyrtarisht Mourinhon pas zgjedhjeve presidenciale të klubit më 7 qershor.

Presidenti Florentino Perez, i cili pritet gjerësisht ta ruajë postin pas zgjedhjeve, thuhet se ishte figura kryesore pas rikthimit të Mourinhos në “Bernabeu”.

Kundërshtari i Perezit për presidencën e Real Madridit, Enrique Riquelme, ka deklaruar se Mourinho nuk do të ishte zgjedhja e tij për trajner të ekipit, raportojnë Ornstein dhe Cortegana.

Mourinho aktualisht është ende në krye të Benficas, por në mes të majit pranoi se kishte bisedime mes Real Madridit dhe agjentit të tij, Jorge Mendes.

Alvaro Arbeloa e kishte zëvendësuar Xabi Alonson si trajner i Real Madridit vetëm në janar, por më 22 maj konfirmoi se do të largohej nga klubi.

“Los Blancos” kanë kaluar dy sezone radhazi pa fituar La Ligan, Kupën e Mbretit apo Ligën e Kampionëve për herë të parë që nga sezonet 2008/09 dhe 2009/10.

Periudha e parë e Mourinhos te Real Madridi nisi në verën e vitit 2010.

63-vjeçari fitoi një titull të La Ligas, Kupën e Mbretit dhe Superkupën e Spanjës gjatë tri sezoneve në krye të ekipit.

Megjithatë, skuadra u eliminua në gjysmëfinale të Ligës së Kampionëve në secilin prej atyre sezoneve./GazetaExpress/