Modriç, heroi i Kroacisë: “Për ne ai është gjithçka”

Futboll

Gazeta Express

23/06/2026 9:19

Për tifozët kroatë, Luka Modriç nuk është thjesht një futbollist. Ai është një hero kombëtar, një gjeni i futbollit dhe, për disa, madje edhe një figurë pothuajse hyjnore.

 Kjo u bë e qartë nga reagimet emocionale të tifozëve para asaj që mund të jetë paraqitja e tij e fundit në Kupën e Botës.

Kur GOAL FanZone pyeti mbështetësit kroatë se çfarë do të thotë kapiteni legjendar për ta, përgjigjet ishin të menjëhershme dhe plot emocion.

“Për Kroacinë ai është pothuajse si një zot”, tha një tifoz, ndërsa një tjetër shtoi: “Në këtë pikë ai është një hero kombëtar. Pa asnjë dyshim”.

“Na bëre krenarë”

Mesazhet e tifozëve ishin të mbushura me mirënjohje për njeriun që për më shumë se një dekadë ka qenë simboli i futbollit kroat.

“Faleminderit që na ngrite moralin dhe na bëre krenarë për vendin tonë gjatë gjithë këtyre viteve”, tha një tifoz i emocionuar.

Një tjetër nuk kurseu lëvdatat: “Modriç, ti je një gjeni. Një gjeni i futbollit”.

@goalfanzone Croatia fans' messages to their GOAT Luka Modric 🥲 #football #worldcup #fifaworldcup #croatia #modric ♬ original sound – GOAL's FanZone

Por ndoshta përshkrimi më i fuqishëm erdhi nga një tifoz që përdori vetëm një fjalë për të shpjeguar rëndësinë e tij për Kroacinë:

“Gjithçka”.

Vallëzimi i fundit?

Modriç, i cili mbushi 40 vjeç në shtator të vitit 2024, ka pranuar se Kupa e Botës 2026 mund të jetë paraqitja e tij e fundit në skenën më të madhe të futbollit. Për këtë arsye, rrëfimi i “vallëzimit të fundit” ka shoqëruar Kroacinë gjatë gjithë turneut.

“Vallëzimi i fundit? Atëherë po shkojmë deri në finale”, tha me bindje një tifoz.

Megjithatë, jo të gjithë janë gati ta pranojnë fundin.

“Shihemi pas katër vitesh. Mund ta bësh edhe një Botëror tjetër”, tha me buzëqeshje një mbështetës optimist.

Njeriu që ndryshoi historinë e Kroacisë

Modriç udhëhoqi Kroacinë drejt finales historike të Kupës së Botës në vitin 2018 dhe po atë vit fitoi edhe Topin e Artë, duke ndërprerë dominimin 11-vjeçar të Lionel Messi dhe Cristiano Ronaldo. Katër vite më vonë ai e çoi kombëtaren deri në gjysmëfinalen e Botërorit në Katar, duke dëshmuar se talenti i tij nuk njeh moshë.

Për një vend me më pak se katër milionë banorë, ndikimi i Modriçit shkon përtej statistikave dhe trofeve. Ai i bëri kroatët të ndihen më të mëdhenj se kurrë.

“Zoti të bekoftë. Ti je heroi ynë”, ishte mesazhi i një tifozi.

Pavarësisht nëse ky është apo jo Botërori i fundit i Luka Modrić, një gjë mbetet e sigurt: Kroacia nuk do ta harrojë kurrë njeriun që e bëri të ëndërrojë. /GazetaExpress/