Michael Oliveri është në mesin e katër gjyqtarëve që mund të mos lejohen të referojnë finalen

Futboll

Gazeta Express

09/07/2026 17:00

Michael Oliveri është një nga disa arbitrat që mund të pengohen të drejtojnë ndeshje në fazën përfundimtare të Kupës së Botës, nëse njëra prej dy kombëtareve arrin deri në finale.

Oliver është pjesë e listës së 52 arbitrave të FIFA-s për Kupën e Botës, ndërsa Anthony Taylor është arbitri tjetër anglez në turne.

Oliver do të gjykojë çerekfinalen mes Spanjës dhe Belgjikës, e cila mund të rezultojë edhe ndeshja e tij e fundit në këtë Botëror.

Ai nuk mund të arbitrojë ndeshje të Anglisë, e cila ndodhet në anën tjetër të tabelës, pasi arbitrat nuk lejohen të gjykojnë takime ku luan kombëtarja e vendit të tyre.

Megjithatë, sipas gazetarit të “BBC Sport”, Dale Johnson, Oliver nuk mund të drejtojë as ndeshje të Argjentinës, për shkak të situatës gjeopolitike mes Mbretërisë së Bashkuar dhe Argjentinës lidhur me Ishujt Falkland.

Lufta e Falklandit u zhvillua mes Mbretërisë së Bashkuar dhe Argjentinës për një periudhë 10-javore në vitin 1982, pasi forcat argjentinase pushtuan dhe morën nën kontroll Ishujt Falkland.

Konflikti përfundoi pas 74 ditësh luftimesh, më 14 qershor 1982, me dorëzimin e forcave argjentinase. Si rezultat, ishujt mbetën nën kontrollin britanik.

Gjatë luftës humbën jetën 649 ushtarakë argjentinas dhe 255 ushtarakë britanikë. Gjithashtu, 777 ushtarakë britanikë u plagosën dhe tre civilë britanikë mbetën të vrarë.

Edhe sot, Argjentina vazhdon ta kundërshtojë sovranitetin britanik mbi Ishujt Falkland.

Në vitin 2013, banorët e ishujve votuan me 99.8 për qind në favor të vazhdimit të statusit si Territor Britanik Jashtë Shtetit. Nga 1.516 votues, 1.513 votuan “po”, ndërsa vetëm tre votuan “jo”. Pjesëmarrja në referendum ishte 92 për qind.

Përballjet mes Anglisë dhe Argjentinës mbeten një nga rivalitetet më të mëdha në futboll. Kjo u dëshmua edhe pasi disa futbollistë argjentinas kënduan një këngë me referenca për Ishujt Falkland pas fitores 3-2 ndaj Egjiptit në 1/8 e finales të martën.

Nëse të dyja kombëtaret arrijnë deri aty, Anglia dhe Argjentina do të përballen në gjysmëfinalen e Kupës së Botës.

Një skenar i tillë do ta përjashtonte automatikisht Michael Oliverin dhe Anthony Taylorin nga mundësia për të arbitruar finalen në New Jersey.

E njëjta gjë vlen edhe për arbitrat argjentinas Yael Falcón Pérez, Darío Herrera dhe Facundo Tello.

Anthony Taylor, i cili kishte qenë kandidat për të drejtuar finalen e Kupës së Botës 2022 nëse Argjentina nuk do të ishte pjesëmarrëse, deri tani ka arbitruar tri ndeshje në këtë turne, përfshirë fitoren 1-0 të Spanjës ndaj Portugalisë në 1/8 e finales.

Sipas “The Times”, në vitin 2022 FIFA kishte shqetësime se Argjentina mund të vinte në dyshim paanshmërinë e Taylorit, edhe për shkak të thirrjeve kundër Falklandit që disa lojtarë argjentinas kishin bërë para finales.

Ndërkohë, Facundo Tello është caktuar të drejtojë çerekfinalen mes Francës dhe Marokut, e cila do të hyjë në histori si ndeshja e parë në Kupën e Botës që do të arbitrohet nga një ekip i tërë arbitrash nga i njëjti shtet.

Atij do t’i bashkohen ndihmësit Juan Pablo Belatti dhe Gabriel Chade, arbitri i katërt Darío Herrera dhe arbitri rezervë Cristian Navarro.

Yael Falcón Pérez ka drejtuar dy ndeshje të fazës së grupeve dhe sfidën e raundit të 1/16 së finales mes Zvicrës dhe Algjerisë.

Ndërsa Darío Herrera deri më tani ka arbitruar vetëm ndeshjen e fazës së grupeve mes Belgjikës dhe Iranit.

Ka edhe disa arbitra të tjerë që mund të mos kenë mundësi të drejtojnë ndeshje të mëtejshme nëse kombëtaret e tyre vazhdojnë rrugëtimin në turne:

• Espen Eskas (Norvegjia)
• Alejandro Hernández (Spanja)
• Jalal Jayed (Maroku)
• François Letexier (Franca)
• Clément Turpin (Franca)

Sandro Schärer (Zvicra)./GazetaExpress/