“Messi mund ta luajë Botërorin 2030”

Futboll

Gazeta Express

24/06/2026 10:19

Ish-futbollisti anglez, Gabby Agbonlahor, beson se Lionel Messi mund ta çojë Aston Villën drejt titullit të Premier League dhe Ligës së Kampionëve, ndërsa është i bindur se argjentinasi do të vazhdojë karrierën deri në Kupën e Botës 2030, kur do të jetë 43 vjeç.

Duke folur për talkSPORT, Agbonlahor u pyet se cilin lojtar do të dëshironte të shihte te Aston Villa mes Messit, Harry Kane, Kylian Mbappe dhe Erling Haaland. Përgjigjja e tij ishte e menjëhershme.

“Messi. Mendoj se Villa do ta fitonte Premier League-n”, tha ai. Më pas shtoi me bindje: “Nëse Aston Villa e transferon Messin, atëherë fiton Premier League-n dhe Ligën e Kampionëve.”

Deklarata vjen pas fillimit spektakolar të Messit në Kupën e Botës 2026. Kapiteni i Argjentinës u bë lojtari më i vjetër që realizon hat-trick në një ndeshje të Botërorit, pasi shënoi tre gola në fitoren 3-0 ndaj Algjerisë. Më pas ai shtoi edhe dy gola në suksesin 2-0 kundër Austrisë.

Me këto paraqitje, Messi ka shënuar në gjashtë ndeshje radhazi të Kupës së Botës dhe ka arritur në kuotën e 18 golave, duke u bërë golashënuesi më i mirë në historinë e turneut.

Agbonlahor u bëri thirrje tifozëve që ta shijojnë sa më shumë lojën e argjentinasit.

“Kur e pashë Argjentinën në Katar, ndihesha sikur isha në praninë e një perëndie. Atmosfera ishte si një koncert 90-minutësh i Messit dhe ishte një nga përvojat më të mira që mund të përjetosh në futboll”, deklaroi ai.

Ndërsa shumëkush mendon se ky do të jetë Botërori i fundit i Messit, ish-sulmuesi anglez ka një mendim krejt tjetër.

“Më besoni, mos u habisni nëse Messi luan edhe një Kupë Bote tjetër. Unë mendoj se ai do të jetë pjesë edhe e Botërorit 2030”, tha Agbonlahor.

Argjentina tashmë e ka siguruar vendin e parë në grup dhe do ta mbyllë fazën e grupeve kundër Jordanisë. Në fazën e 32 më të mirëve, kampionët në fuqi do të përballen me skuadrën e vendit të dytë nga Grupi H, ndërsa Messi do të synojë të vazhdojë formën e jashtëzakonshme para portës. /GazetaExpress/