Mersim Zeqiri gati për meçin e karrierës: Më 20 korrik e shohim se kush është më i miri

Boks

Gazeta Express

18/07/2024 15:54

Mersim Zeqiri është bërë gati për atë që po konsiderohet si meçi më i madh i karrierës së tij.

Boksieri shqiptar nga Maqedonia e Veriut do të zbresë në ring këtë të shtunë, ndërsa përballë do ta ketë boksierin nga Venezuela, Gregorio Dominguez.

Me një fitore eventuale në natën e spektaklit të boksit “Gara Fight Night”, boksieri shqiptar me banim në Zvicër do të mundë t’i fitonte dy tituj internacional – UBO dhe UBF dhe më pas do t’i hapeshin dyert që të garojë për tituj të tjerë të rëndësishëm në karrierë.

Sot, në konferencë për shtyp u paraqitën të dy boksierët, të cilët i treguan synimet e tyre

“Unë kam ardhur këtu i përgatitur, ushtrimet i kam bërë te Arnold Gjergjaj, kemi punuar edhe me Enver Salihun si trajner, në disa aspekte, por nuk do t’i tregojmë me detaje. Në datën 20, midis ringut, e kqyrim kush është më i miri dhe fitoftë më i miri”, deklaroi Zeqiri.

“Në radhë të parë i falënderoj organizatorët për mundësinë e dhënë, ndihem shumë mirë, jam përgatitur maksimalisht për këtë meç. Pres meç të vështirë me Mersimin”, u shpreh Dominguez.

Promotori Avdyl Salihu tha se konceptin e kësaj gala mbrëmjeje të boksit e ka formuar me bashkëpunëtorët shtatë muaj më parë, që nga dhjetori.

“Në çdo luftë e kemi siguruar nga një boksier cilësor shqiptar. Nëse Mersimi e fiton këtë ndeshje, mund të premtoj se do ta bëjmë një meç shumë më të madh se me të vërtetë ky fshat më ka përkrah shumë, secilin prej jush i falënderoj”, deklaroi promotori shqiptar.

Është konfirmuar pjesëmarrja e shtatë boksierëve shqiptarë, pra na presin shtatë super-meçe në Garanë.

Bëhet fjalë për boksierët nga trevat e ndryshme shqiptare si: Victor Cakiqi, Ndriçim Emini, Aleksander Kallashi, John Jini, Dielli Vranovci, Elbasan Hajzeraj dhe Mersim Zeqiri.