Tyrone Mings e shprehu përkrahjen e tij për lëvizjen “Black Lives Matter” (shqip: “Jeta e njerëzve me ngjyrë ka rëndësi”), duke marrë pjesë në një protestë, bashkë me rreth 4000 njerëz të tjerë, në Birmingham të Anglisë të enjten.
Mbrojtësi i Aston Villës dhe Anglisë, i cili mori pjesë në protestën në sheshin Victoria në Birmingham, protestoi kundër racizmit dhe brutalitetit policor, pas vdekjes së amerikanit George Floyd dhe viktimave të tjera me ngjyrë si shkak i dhunës së ushtruar nga policët, transmeton Gazeta Express.
Futbolli dhe politika i kanë kryqëzuar rrugët gjatë ditëve të fundit, pasi që një numër i futbollistëve dhe klubeve të famshme i janë bashkuar lëvizjes “Black Lives Matter” pas vdekjes së George Floyd.
Floyd vdiq më 25 maj, pasi një polic i bardhë, i cili që nga atëherë është arrestuar dhe akuzuar për vrasjen e tij, e kishte mbajtur në tokë duke ia vënë gjurin mbi qafë për gati nëntë minuta.
Mings postoi në llogaritë e tij në rrjete sociale fotografi nga këto protesta, me mbishkrimin: “Asgjë tjetër përveç energjisë së mirë dhe pasionit sot. Unë s’kërkoj falje që po e ngre zërin për atë që e besoj”.
Nothing but energy & passion today.
— Tyrone Mings (@OfficialTM_3) June 4, 2020
I make no apologies for standing up for what I believe in. pic.twitter.com/QtnGKgIpfE
Ndërsa, policia e atij rajoni tha se protestat kishin qenë paqësore dhe se kishin përfunduar pa asnjë incident.
“Rreth 4000 persona morën pjesë në një protestë paqësore në qendrën e Birminghamit sot. Protestuesit ishin të zhurmshëm dhe me pasion dhe e bëmë të qartë synimin e tyre. Nuk pati asnjë të arrestuar dhe asnjë incident”, thuhet në njoftimin e policisë. /Gazeta Express/