Liverpooli po bëhet gati për t’ia rrëmbyer Unitedit lojtarin nga duart

Futboll

Gazeta Express

12/07/2026 23:25

Liverpooli po synon t’ia rrëmbejë edhe një objektiv të rëndësishëm një rivali nga Premierliga, pasi raportimet bëjnë të ditur se të kuqtë janë në garë për transferimin e një prej objektivave kryesorë të Manchester Unitedit.

Skuadra nga “Anfield”, që po përgatitet për sezonin 2026/27 nën drejtimin e trajnerit të ri Andoni Iraola, më herët ia fitoi garën Newcastle për anësorin e Osasunas, Victor Munoz.

Po ashtu, Liverpooli ka siguruar edhe mbrojtësin premtues Jeremy Jacquet, pasi marrëveshja prej 60 milionë funtesh me Lille ishte arritur që në muajin shkurt.

Megjithatë, një nga prioritetet kryesore të Liverpoolit mbetet mesfusha, pas vështirësive të hasura në këtë repart në sezonet e fundit.

Sipas “The Kopite View”, përmes “TEAMtalk”, klubi nga Merseyside ka ringjallur interesimin për një futbollist që ka lënë përshtypje shumë të mira në Kupën e Botës.

Raportimet bëjnë të ditur se Liverpooli është rikthyer në garë për mesfushorin francez Manu Kone, një lojtar që e vlerëson prej disa vitesh.

Me Aurelien Tchouamenin që pati probleme me lëndim, Kone u hodh menjëherë në formacion në Kupën e tij të parë të Botës, por ka dhuruar disa paraqitje shumë të mira në qendër të mesfushës.

24-vjeçari ka qenë titullar në katër ndeshje të Francës në këtë turne, ndërsa “Les Bleus” do të përballen me Spanjën në gjysmëfinalen që zhvillohet të martën në Arlington të Teksasit.

Kone po shndërrohet me shpejtësi në një nga mesfushorët defensivë më të mirë në qarkullim dhe po ndiqet me interes edhe nga Manchester Unitedi, që ka nevojë urgjente për një përforcim në atë repart pas largimit të Casemiros.

Manchester Unitedi kishte identifikuar Edersonin e Atalantas si objektivin kryesor, por u tërhoq nga marrëveshja prej 35 milionë funtesh pasi zbuloi një problem të fshehur në gju.

Tani “Djajtë e Kuq” mund të kërkojnë një alternativë tjetër në Serie A, te Roma, ku luan Kone.

Megjithatë, me cilësitë që zotëron, ai konsiderohet një profil ideal edhe për Liverpoolin në kuadër të rindërtimit të skuadrës nga Iraola.

Sipas raportimeve, Kone, i cili ka edhe tre vite kontratë me Romën, mund të jetë i disponueshëm për rreth 47 milionë funte.

Mesfushori francez ka krijuar një partneritet shumë të mirë me Adrien Rabiot në qendër të mesfushës, duke i dhënë ekuilibër ekipit dhe duke u mundësuar lojtarëve si Michael Olise, Kylian Mbappe, Ousmane Dembele dhe Desire Doue të shfaqin potencialin e tyre në fazën sulmuese.

Duke folur për ndikimin e tyre, Didier Deschamps deklaroi: “Janë shumë të rëndësishëm në rikuperimin e topit, sidomos kur ushtrojmë presion të lartë në fushë, por edhe në furnizimin e lojtarëve tanë ofensivë me pasimet e duhura”.

Pavarësisht paraqitjeve të mira, “L’Equipe” raporton se Kone nuk pritet të jetë titullar në gjysmëfinalen e së martës.

Mediumi francez shkruan se mesfushori i Real Madridit, Tchouameni, është rikuperuar nga problemi muskulor dhe do të rikthehet në formacionin startues.

Futbollisti i Real Madridit mungoi në fitoren 1-0 ndaj Paraguait në fazën e 1/8 së finales, si dhe në suksesin ndaj Marokut në çerekfinale të enjten.

“Edhe pse Manu Koné zhvilloi një paraqitje solide kundër Marokut,” shkroi “L’Equipe”.

“Statusi dhe rëndësia e Tchouaménit për ekuilibrin e skuadrës i garantojnë një vend në formacionin startues, ndërsa Adrien Rabiot ka qenë në formë të shkëlqyer që nga fillimi i Kupës së Botës dhe pritet ta vazhdojë këtë seri”, thuhet tutje.

Kone e nisi karrierën te Toulouse në Francë, përpara se t’i bashkohej Borussia Monchengladbachut, ku zhvilloi 86 ndeshje.

Më pas ai u transferua te Roma, ku ka regjistruar 82 paraqitje gjatë dy sezoneve të fundit.

Ai debutoi me kombëtaren e Francës në shtator të vitit 2024 dhe deri më tani ka zhvilluar 18 ndeshje me fanellën e “Les Bleus”./GazetaExpress/